"Жеңіл рельсті транспорт жүйесі іске қосылса, шаһардағы кептеліс мәселесі шешіледі", - дейді мамандар. Қасым-Жомарт Тоқаев елорданы дамыту жөніндегі кеңесте шаһар басшысына бірқатар тапсырма жүктеді. Олардың бірі әрі негізгісі – жыр болған жеңіл рельсті транспорт жобасын жүзеге асыру. Президент тұрғындарға берілген уәдені орындау керектігін айтты.

"Қазір жұмыс қарқынды жүріп жатыр. Құрылысты жандандыру мақсатында, өткен жылы Үкімет қаржының алғашқы бөлігін бөлді. Бүгінгі таңда бірінші кезеңді аяқтауға күш салынып отыр. Жобаны толыққанды бітіру үшін 2 жыл уақыт қажет", – деді қала әкімі Жеңіс Қасымбек.

Жобаға бюджеттен 52,4 миллиард теңге бөлінді. Бірақ істі аяғына дейін жеткізу үшін, бұл сома аздық етеді, дейді мамандар.

"Жұмысты жоспарлағанымыз бойынша эстакада бөлігіне жүргіземіз. Іргетастарының бәрін, бұрғылау жұмыстары бар, солардың бәрін бітіреміз. 80 пайыз тірек бөлігі дейді, яғни бағаналарды қоямыз. Енді өзінің жоспары, межесі бар, бәрі келісілген. Бірақ оның бәрі қаржыға байланысты. Қаржы қалай бөлінеді, біз солай межені орындаймыз", – деп мәлімдеді "City Transportation Systems" компаниясының басқарушы директоры Бақыт Қарсақбаев.

Құрылыс жұмыстары екі кезеңге бөлінген. Бірінші кезеңде 18 аялдаманың тек 8-і қолданысқа беріліп, 5 метрополитен пойызы сынақтан өтеді. Вагондарға жүк тиеліп, олардың жарамдылығы тексеріледі. Жалпы LRT ұзындығы 22 шақырым. Құрылыс жұмысына тағы мыңнан астам адам тартылады.

Талқылау