Әнші The Limba Тоқаевты үстел теннисінен сайысқа шақырды

Көпшілікке The Limba лақап атымен танымал қазақстандық әнші Мұхамедәлі Ахметжанов Мемлекет басшысы Қасым-Жомарт Тоқаевқа көпшілік алдында ерекше ұсыныс жасады. Бұл туралы Stan.kz ақпарат агенттігі хабарлайды.

Өнер иесі Instagram парақшасында Президентті үстел теннисінен достық кездесу өткізуге шақырды.

The Limba бұл ұсынысын креативті түрде жеткізген. Жасанды интеллект көмегімен жасалған бейнероликте Қасым-Жомарт Тоқаев компьютерлік ойынның ешкім жеңе алмайтын “соңғы қарсыласы” ретінде бейнеленіп, үстел теннисінен жоғары шеберлік көрсетеді.

Оқыңыз

Әнші The Limba өзіне ұнамайтын қыздар туралы айтамын деп көпшіліктің сынына қалды Оқыңыз

Әнші Мемлекет басшысының спорттағы жетістіктерін жақсы білетінін айтып, өз ойын жеткізді.

“Қасым-Жомарт Кемелұлы, сіздің спорттық жолыңызды жақсы білемін. Сіз үстел теннисінен спорт шеберлігіне кандидатсыз. Сізбен бір партия ойнауды көптен бері армандаймын. Қазір өз деңгейім сізге лайықты қарсылық көрсетуге жетеді деп сенемін”, – деді The Limba.

Жазбасына әнші Президенттің үстел теннисі үстелінде түскен суретін де қоса жариялаған.

Айта кетейік, Қасым-Жомарт Тоқаев бұл спорт түрімен ұзақ жылдар бойы айналысып келеді. Ол 13 жыл бойы Қазақстан үстел теннисі федерациясын басқарған және үстел теннисінен спорт шеберлігіне кандидат атағына ие.

Бұған дейін Мемлекет басшысы Түркия Президенті Режеп Тайип Ердоғанмен және Қытай Төрағасы Си Цзиньпинмен де ресми кездесулер барысында үстел теннисін ойнаған.

Әзірге Ақорданың баспасөз қызметі әншінің бұл ұсынысына қатысты ресми пікір білдірген жоқ. Ал әлеуметтік желі қолданушылары Президент шақыруды қабылдай ма деген сауал төңірегінде қызу талқылап жатыр.