Бельгиялық отбасы асырап алған қазақ қызы өз туыстарын тауып алды

Шетелдіктер асырап алған қазақ қызы биологиялық ата-анасын тауып, туған-туысымен қауышты. Анджелина Динара туыстарымен Бельгияда кездесті. Тағдыр тәлкегіне ұшыраған жандар енді бір-бірінен ажырамайтынын айтады. Бұл туралы Stan.kz ақпарат агенттігі “Қазақстан” арнасына сілтеме жасап хабарлайды. 

Бельгиялық Алекс пен Кони Динараны 2005 жылы 1 жасында асырап алған. Ол Астанадағы балалар үйінде тәрбиеленіп жатқан еді. 
Қазақы атын сақтай отырып, Анджелина деген есім де алған.

"Мен нәрестені бірден ұнаттым. Кеткен кезде фотосына қайта-қайта қарай бердім. Құжаттарын ресімдеуге 2 ай кетті. Бұл өміріміздегі ең бақытты кезеңдердің бірі", – деді асырап алған анасы Кони Фон Вуурен.

11 жасында Динара туған ата-анасын тауып беруді өтінген. Осылайша Қазақстанға үш рет келіп, биологиялық анасын көріп, елдің мәдениетімен танысты.

Оқыңыз

"Менің атым Айнұр болған": Шетелдіктер асырап алған қазақстандық қыз ата-анасын іздеп жүр Оқыңыз

"Достарым "сенің өз ата-анаң кім?" дегенде күмілжіп қалатынмын. Енді еш қиналмастан, айтып бере аламын. Мен кім екенімді, шыққан тегімді, тағдырымның қалай өрбігенінен хабардармын", – деді Динара Сессель.

Динараның биологиялық анасы 3 жыл бұрын дүниеден озған. Десе де анасының туыстары хабарға шығып, көрісу үшін Бельгияға келіпті.

"2009 жылы бізді тауып алды. Содан бері араласамыз. Бұрын араласпай қалған кезімізді осылай өтеуге тырысып жүрміз", - деді Динараның нағашысы Гүлзада Оразаева.

Енді Динара ана тілін үйреніп жүр.