Алматыда дәрігерлер бесінші қабаттан құлаған төрт жастағы баланы аман алып қалды

Алматы қалалық Балаларға шұғыл медициналық көмек көрсету орталығының дәрігерлері тұрғын үй кешенінің бесінші қабатынан құлап, ауыр жарақат алған төрт жастағы балаға күрделі нейрохирургиялық ота жасап, аман алып қалды. Бұл туралы Stan.kz ақпарат агенттігі хабарлайды.

Қалалық Қоғамдық денсаулық сақтау басқармасының өкілдерінің айтуынша, бала аурухананың қабылдау бөліміне ауыр жағдайда жеткізілді. Ол көптеген жарақат алған. Дәрігерлер жұлынға қысым түсірген бірінші бел омыртқасының ығысқан компрессиялық сынуын анықтады.

Науқастың жағдайын ескерген мамандар емдеуді екі кезеңмен жүргізді. Алдымен нейрохирургтер омыртқа өзегіндегі қысымды азайту үшін ота жасап, кейін бел омыртқасын арнайы бекіту жүйесі арқылы тұрақтандырды.

Күрделі отаны нейрохирургия бөлімінің меңгерушісі Айдын Нүсіпқожаевтың жетекшілігімен нейрохирургтер Мұхтар Ибрагимов пен Алтай Анарбай жүргізді.

Дер кезінде көрсетілген медициналық көмектің арқасында дәрігерлер баланың қозғалу және сезіну қабілетін сақтап қалды.

"Біз баланың қозғалыс қызметін қалпына келтірдік. Оңалту курсынан кейін ол өздігінен жүре алады", – деді Айдын Нүсіпқожаев.

Оқыңыз

"Қол қусырып тұра алмадым": Алматылық әке 1 жастағы көршісінің баласын қалай аман алып қалғанын айтып берді Оқыңыз

Қазір кішкентай науқастың жағдайы едәуір жақсарған. Стационарлық ем аяқталғаннан кейін ол үйіне шығарылып, амбулаториялық бақылау мен оңалту емін жалғастырады.