Алматы облысында әкім мен жергілікті тұрғын арасында төбелес болды

Алматы облысы, Тұздыбастау ауылдық округінің әкімі жергілікті тұрғынмен төбелесіп қалған. Бұл туралы Stan.kz ақпарат агенттігі хабарлайды. 

Фото: gov.kz

Оқиғаға қатысты облыс әкімдігі мәлімдеме жасады. Әкімдік мәліметінше, тұрғындардың бірі бекітілген бас жоспарға наразылық білдірген. Жаңа бас жоспар бойынша, азаматтың жер телімі қызыл сызық бойына түсуіне келіспей, жанжал шығарған.

"Қазір Тұздыбастау ауылдық округінің әкіміне қатысты Талғар ауданының әкімдігі мен Талғар аудандық полиция басқармасы тарапынан қызметтік тексеру жүргізілуде. Әкімнің кінәсі дәлелденсе, оның әрекеті мемлекеттік қызмет істері агенттігінің Алматы облысы бойынша әдеп жөніндегі кеңесінде қаралады. Ал тұрғын қосымша түсініктеме алу үшін 23 шілдеде аудан әкімінің аппаратына шақырылды", – делінген облыс әкімдігінің хабарламасында. 

"Не мектеп, не жол жоқ": Алматы облысында тұрғындар саяжайға ауыл мәртебесін бермегеніне наразы

Ауылдық округ әкімдігі бұрынғыдай жұмысын жалғастыруда.

Әкімдік сайтындағы мәліметке сәйкес, Тұздыбастау ауылдық округінің әкімі қызметін 2023 жылдың ақпан айынан бері Шыңғыс Толымбеков атқарып келеді.

Еске салсақ, бұған дейін Алматы облысында ауыл тұрғындарының алтын кенішінің жұмысына наразылық білдіргені туралы жазған едік.