"400 теңгеге дейін өсіру керек": Алматыда автобустағы жол жүру ақысын көтеру ұсынылды
Алматыдағы жолаушы тасымалдаушылар қоғамдық көлік бағасын көтеруді сұрап отыр. Олар кейбір маршрутқа оңтайлы тариф 400 теңге болуы керек дейді. Әкімдіктегілер автобустар мен қосалқы бөлшектердің құнын есептеп, осындай қорытындыға келген. Бұл туралы Stan.kz ақпарат агенттігі Информбюро бағдарламасына сілтеме жасап хабарлайды.
Фото: Stan.kz
Алматыда жол жүру ақысы кейінгі рет өткен жылдың тамыз айында көтерілді. Одан кейін көлік картасымен төлеу кезінде тариф сексен теңгеден жүзге, қолма-қол ақшамен төленген жағдайда 150 теңгеден 200 теңгеге дейін көтерілді.
Бірақ "City Bus" ЖШС бас директоры Абылай Өстемірдің пікірінше, бұл өсім жолаушы тасымалдаушыларының көңілінен шықпайды, себебі құны әлдеқайда жоғары болуы керек деп отыр.
"Тарифтерді есептеу әдістемесіне сәйкес, біз қазір сатып алып жатқан электроавтобус орташа есеппен маршрутқа байланысты бір жолаушыға 400 теңгеден тұрады. Қазір Алматы экологиялық таза көлік түрлеріне қарқынды көшіп жатыр. Бұрын бізде дизельді автобустар еді. Биылдан бастап жаңартуды бастап жатырмыз және бір электробус 170 миллион теңгеден тұрады”, – деді "City Bus" ЖШС бас директоры.
Қосалқы бөлшектерді сатып алуға да ақша керек дейді тасымалдаушылар. Олардың айтуынша, кейінгі жылдары олардың құны орта есеппен 15% өскен. Олар әзірге мемлекеттік субсидиялар елеулі шығынның алдын алуға септігін тигізеді деп отыр. Биыл билік тасымалдаушыларды қолдауға 97 миллиард теңге бөлді. Қалалық мобильдік бөлімі басшысының орынбасары Бауыржан Құмарғазин шығынның 15%-ын ғана төлейтінін айтты.
"Бұл сұрақ өзекті. Басшылық тасымалдаушылар алған субсидия шығындарының бір бөлігін ғана жабады. Демек біз олардың қосалқы бөлшектері, дөңгелектері және басқа да заттарына жұмсаған шығынының 15%-ын ғана төлейміз. Сәйкесінше қолданыстағы тариф олардың, тасымалдаушылардың шығынын өтемейді", – деді Бауыржан Құмарғазин.
Ал алматылықтардың өздері мұндай шығынға дайын емес. Әйтпесе, автобуспен емес, таксимен жүру тиімдірек. Дегенмен таксистер де артынша бағаны көтеріп алу ықтималдығы жоғары.
Бүгінде Алматыда 23 қоғамдық көлік компаниясы жұмыс істейді, оның тек біреуі ғана мемлекет меншігінде тұр. Жалпы бәрінде 3000-ға жуық автобус бар. Ал әкімдік баға көтеру туралы сұраққа нақты жауап бермеді. Тек осы мәселені қарастыруға уәде берді.
Еске салайық, бұған дейін Алматыда 18-автобусқа жеңіл көлік соқтығысып, салдарынан бір адам қаза тапқанын жазған едік. Тағы 16 жолаушы зардап шеккен. Оқиға Мақатаев көшесі мен Сейфуллин даңғылының қиылысында болған. Алматы полиция департаментінің баспасөз қызметі апат туралы пікір білдірді.