Алимент төлемеген қазақстандық бас бостандығынан айырылды
Шығыс Қазақстан облысында Әділет департаментінің қызметкерлері алимент бойынша борышкерлерді балаларына тиесілі ақшаны төлеуге мәжбүр етті. Бұл туралы Stan.kz ақпарат агенттігі хабарлайды.
Фото: pixabay.com
Атап айтқанда, алимент бойынша қарызды төлеу үшін қазақстандық Lexus маркалы көлігін, екіншісі жылжымайтын мүлкін сатты.
"ШҚО тұрғынынан алимент өндіріп алынды. Әділет департаменті мен ШҚО полиция департаментінің бірлескен рейдінде Lexus RX 330 маркалы автокөлік арнайы тұраққа қойылды. Кейіннен автокөлікті жеке сот орындаушылары қарызды өтеу есебінен сатты, ол 4 миллион 448 мың 885 теңгені құрады", – деді ШҚО әділет департаменті басшысының орынбасары Ермек Қорабаев.
Осындай жағдай балаларына бес миллион теңге қарыз болған өңірдің басқа тұрғынына да қатысты жасалды. Әкесі 2020 жылдан бері ұлы мен қызына алимент төлемеген, төлемнен қасақана жалтарған және жеке сот орындаушыларынан жасырынған.
"ШҚО әділет департаменті мен жеке сот орындаушысы қызметкерлерінің бірлескен іс-шараларынан кейін 2024 жылғы ақпанда аталған борышкердің жылжымайтын мүлікте үлесі бар екені анықталды. Сот ұйғарымымен борышкердің жылжымайтын мүлкі заттай өтеу есебінен өндіріп алушыға берілді. Басқаша айтқанда, төрт бөлмелі пәтердің жартысы қазір балаларға тиесілі", – деп түсіндірді Ермек Қорабаев.
Ресми мәліметтер бойынша, ШҚО-да алимент бойынша борышкерлерге қатысты 13 мыңнан астам іс бар. Оның ішінде жеті мыңнан астамы мерзімдік орындауда, қалғандары ерікті тәртіппен өтеледі.
"Төлеуден қасақана жалтарғандарға қатысты әкімшілік және қылмыстық сипаттағы ең қатаң шаралар қабылданып жатыр. 2023 жылы 28 борышкер қылмыстық жауапкершілікке тартылды, оның ішінде бір адам бір жылға екі айға бас бостандығынан айырылды. 25 адам әкімшілік жауапкершілікке тартылды. 2024 жылдың басынан бері аталған жауапкершілік түрлеріне тоғыз адам тартылды", – деп хабарлады ШҚО Әділет департаменті.
Сондай-ақ Қостанайда алимент бойынша борышкер бір жылға колонияға жіберілді. Ер адам мүгедектігі бар өз ұлына 400 мың теңге қарыз болды. Бұрын ол шартты түрде бас бостандығынан айырылған.
"Сотталушы алкогольге тәуелділіктен зардап шегетіндіктен, кәмелетке толмаған баланы асырап-бағуға алимент төлеуден жалтарды. Бас бостандығын шектеу түріндегі алдыңғы жазаны, жәбірленушінің ұстанымын, кәмелетке толмаған мүгедек баланың құқықтары мен мүдделерін қорғауды ескере отырып, сот оған неғұрлым қатаң жаза тағайындап, бір жыл мерзімге бас бостандығынан айырды", – деп хабарлады Қостанай облысының кәмелетке толмағандар ісі жөніндегі мамандандырылған ауданаралық соты.
Айта кетейік, бұған дейін Қазақстанда алимент қорын құру туралы жазған едік.