Алакөл туристер үшін карантин аяқталғанға дейін жабылды
Шығыс Қазақстан облысындағы Алакөл көлінде демалушыларды қабылдау тоқтатылды, деп хабарлайды Stan.kz ақпарат агенттігі.
Бұл туралы бүгін Үржар ауданының бас мемлекеттік санитарлық дәрігерінің бұйрығы жарияланғаннан кейін белгілі болды.
"2020 жылдың 23 шілдесінен бастап Үржар ауданының Алакөл көлінің туристік-рекреациялық аймағында демалушыларды қабылдауды тоқтатылсын. 2020 жылдың 23 шілдесіне дейін келген демалушыларға демалыс орталықтарында демалыс аяқталғанша тұруға рұқсат етіледі", - делінген жарлықта.
Үржар ауданының әкіміне, Үржар ауданының учаскелік полиция бөліміне, Үржар ауданының Алакөл көлінің туристік аймағына кіретін жолды 2020 жылдың 23 шілдесінен бастап жабу және Алакөл көліне апаратын жолдарда жылжымалы посттардың жұмыс істеуін қамтамасыз ету, қоғамдық тәртіпті сақтау үшін күнделікті патрульдер жасау тапсырылды.
Көлдің қанша уақытқа жабылатыны белгісіз. Аталған құжатта коронавирустық инфекцияның ауданда таралу жағдайының өзгеруіне байланысты шектеулі шаралардың режимі мен шарттары өзгертілуі мүмкін делінген.