Ақтөбе облысындағы "Қазхром" кен байыту комбинатында апат болып, екі жұмысшы қаза тапты (видео)
Ақтөбе облысы Хромтау ауданында орналасқан Дөң кен-байыту комбинатында жүк көлігі аударылып кетті. Бұл туралы Stan.kz ақпарат агенттігі хабарлайды.
Фото: t.me/HromtauLIVE
Апат салдарынан екі жұмысшы оқиға орнында қаза тапты.
"Қазхром" ТҰК" АҚ филиалы Дөң тау-кен байыту комбинатындағы жол-көлік оқиғасы салдарынан кәсіпорынның екі қызметкері көз жұмды. Оқиға туралы мемлекеттік органдарға хабарланды. Оқыс оқиғаның мән-жайы анықталып жатыр. Компания марқұмдардың отбасына қажет көмекті көрсетеді”, – делінген "Қазхром" компаниясының хабарламасында.
Фото: t.me/HromtauLIVE
Әлеуметтік желіде комбинатта болған жол апатының видеосы жарияланды. Видеодан жүк көлігінің үлкен жылдамдықпен келе жатып, аударылып кеткенін көруге болады.
Ақтөбе облыстық полиция департаментінің мәліметінше, жүк көлігінің жүргізушісі мен жолаушы қаза тапқан.
"Тау-кен немесе құрылыс жұмыстарын жүргізу кезінде қауіпсіздік ережелерін бұзу фактісі бойынша сотқа дейінгі тергеу басталды", – делінген полиция хабарламасында.
Ақтөбе облыстық мемлекеттік еңбек инспекциясы жөніндегі департаменті оқиғаның мән-жайын анықтау үшін комиссия құрды. Тексеру қорытындысы бойынша жауапты тұлғаларға заң аясында шара қолданылады.
“Қазхром” АҚ ERG тобының құрамына енеді, акционерлер құрамында Александр Машкевич (2023 жылы ықпалды бизнесмендер рейтингінде №6 орында), Патох Шодиев, Ибрагимовтер отбасы (2024 жылы ықпалды бизнесмендер рейтингінде №7 орында) және Қазақстан үкіметі (40% үлесі) бар.
Еске салсақ, бұған дейін Ақтөбе облысындағы шахтада кен опырылып, жұмысшы қаза тапқаны туралы жазған едік.