Ақсақалға қол көтерген: Жапа шеккен қарияның ұлы Қордайдағы оқиғаның қалай болғанын айтып берді
Қордайдағы қақтығыста жапа шеккен 80-дегі ақсақалдың ұлы, Масанчи аулының тұрғыны Нұрлан Құдашбаев тәртіпсіздіктің қалай басталғанын айтып берді. Нұрлан Құдашпаевпен сұхбатты қоғам белсендісі Азамат Ерғали өзінің Facebook-тегі парақшасында жариялаған.
"Әкемді көз дәрігеріне апара жатқанбыз. Көлікте отырған мені белгісіз біреу тоқтатты. Не болды? деген сұраққа мені боқтап, ұра бастады", - дейді Нұрлан.
Көлікке жасалған шабуылды тоқтату мақсатында Нұрлан мән-жайды білмек болған.
""Мойнымнан қылқындырды", - дейді ол.
Құдашбаевтың айтуынша, осы уақытта екі адам шабуылдап, бірі ұрып, бірі қылқындырған. Көмекке ағасы келмек болғанда, сыртта тағы екі адам жүгіріп келген.
Тағы оқыңыз
- Қасым-Жомарт Тоқаев дүнген баланың видео жазбасына жауап берді (видео)
- Сарапшылар Қазақстандағы ұлтаралық қақтығыстардың себебін айтты
"Қолында екі балғасы бар екеуі ағам екеумізді тепкілей бастады. Таяқпен жүретін сексендегі әкем арашалаймын деп көліктен шыққанда, басқалары соған жабылды. Ішінен қатты соққы алған ол жерге құлады. Ақсақалды көтермек болған ағасының басынан таспен ұрды. Жедел жәрдем шақырдық, үйдегі туыстарды шақырдым", - дейді ол.
Жол полицейлердің оқиға үстінен түсуі жанжалды тыныштандыруға септігін тигізген.
Нәтижесінде Нұрланның ағасы мен әкесі ауруханаға түскен. Жамбас сүйегі сынған әкесін Алматыға ауруханаға алып кеткен.
Өзі және отбасы мүшелері жапа шеккен Нұрлан Құдашбаев әділеттілік іздейтінін айтады.