Ақмола облысында марихуана шеккен лауазымды шенеунік жұмыстан қуылды
Ақмола облысында марихуана шегіп алып, қызметтік көлік жүргізгені үшін ұсталған Жақсы ауданының бас сәулетшісі бүгін қызметінен кетті. Ол құрылыс және сәулет бөлімін 8 ай ғана басқарған екен. Жол полицейлері Қанат Аханбаевты наурыздың 23-і күні қызметтік көлігімен келе жатқанда тоқтатқан. Бұл туралы КТК хабарлады.
Өзін біртүрлі ұстаған шенеунікті сот-медициналық сараптамаға жіберіпті. Сөйтіп, оның қанынан есірткі анықталған. 29 жастағы сәулетші Жақсы ауданында бұған дейін коммуналдық шаруашылықты басқарған. 3 жыл мемлекеттік қызмет атқарған Аханбаевтың бұл ісін Ақмола облыстық Тәртіптік кеңесі қарап, оны қызметінен кетіру туралы аудан әкіміне ұсыныс жасады. Көлік жүргізу куәлігінен 3 жылға айырылған азамат жылы орнымен де осылай қош айтысты.
«Жасаған әрекетім үшін өкінемін. Есірткіні өмірімде бірінші рет татып көріп едім. Астанадан достарым алып келген»,-дейді Жақсы аудандық құрылыс және сәулет бөлімінің бұрынғы басшысы Қанат Аханбаев.
Оқи отырыңыз:
Қарақшылық шабуыл: Ақтөбе облысында қаскөйлер жүк тасып жүрген жүргізушіні өлтіріп кетті
Тау көшкіні: Көлсайға жақын тұратын жұрт үйлерін тастай қашып жатыр