"Адамдар жақында коронавирустан емес, аштықтан өледі": Әнші Бүркіт президентке үндеу жолдады (видео)
Елімізде болып жатқан төтенше жағдай көпшілікті толғандырып отыр. Оның ішінде өнер адамдары да бар. Осы ретте әнші Бүркіт мемлекет басшысы Қасым-Жомарт Тоқаевқа елде болып жатқан жайтқа назар аударуды сұрап, үндеу жолдады.
Әнші президентке жазған жазбасын желіге жүктеді. Бүркіт мемлекет басшысынан карантин режимін жеңілдетуді сұрайды.
"Құрметті Қасым-Жомарт Кемелұлы! Сізге қазақстандықтар атынан өтініш айтқым келеді. Елімізде жарияланған бір айдан астам уақыт ішінде медициналық қызметкерлер адам бойында вирус бар-жоғын анықтап үлгерді деп ойлаймыз. Біз әр аймаққа барып, тамақ таратамыз. Өкінішке қарай, бәріне бірдей көмектесе алмаймыз. Көп балалы, аз қамтылған отбасыларды көреміз.
- Қазақстанда коронавируспен ауыратындар саны 2 есеге артады - бас санитариялық дәрігердің болжамы
- "Ол менің шәкіртім": Мөлдір Мұқанова Ақтөбеде 10 жылға сотталған лагерь тәрбиешісіне араша сұрайды
Таксистер, тазалықшылар, даяршылар, базарда жұмыс істеп келгендер күнделікті ас-суын таба алмай қалды. Бұған бей-жай қарауға болмайды. Сол себепті карантин режимін жеңілдетіп, бірқатар компаниялар мен мекемелерге санитарлық талаптарды сақтай отыра жұмысын жалғастыруға мүмкіндік беруін сұраймын. Бұл азаматтардың жағдайын жеңілдетеді. Олай болмаған жағдайда, адамдар коронавирустан емес, аштықтан өледі.
Бұл бейбіт заманда тіпті қиын болмақ. Бұны назарға алуыңызды сұраймын. Сізге зор денсаулық пен табыс тілеймін. Рахмет", - деді әнші видеоүндеуінде.
Желі қолданушылары әншінің сөзін қолдап, пікір білдірді.
"Тура айттың, өте орынды, Алла разы болсын. Көмегіңді беріп жатырсың, аман бол", "Халықты ойлайтын әнші, көзімен көрген соң айтады, карантин жағдайды қиындатты", "Бұл сөз жетер жеріне жетсе екен, мен қолдау білдіремін", деді олар.
Енді бірі 42500 теңге жәрдемақының ешбір отбасыға жетпейтінін айтып даурықты.