Ұлттық қор өкілі бала өмірден өтсе қордағы ақшаны кім алатынын айтты
Бала бақилық болған жағдайда “Ұлттық қор – балаларға” жобасынан түскен қаржы кімге беріледі, қалай жұмсалады деген сұраққа Ұлттық қор өкілі жауап берді. Бұл туралы Stan.kz ақпарат агенттігі хабарлайды.
Фото: banki.ru
"Егер бала қандай да бір жағдайда өмірден өтсе, қорда жиналған ақшасы ата-анасына беріле ме?", – деп сұрады Stan.kz тілшісі.
"Жаман айтпай жақсы жоқ. Егер қандай да бір жағдай болып, бала өмірден өтсе, қаражат баланың ата-анасына немесе басқа да мұрагерлеріне қазіргі азаматтық кодекстің ерекше бөлігінде айқындалған тәртіппен беріледі", – деп атап өтті Ұлттық қор және қаржы секторы мәселелері бойынша өзара іс-қимыл департаментінің директоры.
Сонымен қатар Айбол Арғынғазыұлы мұндай кезде қаржының қайда жұмсалғаны тексерілмейтінін айтты.
"Ондай жағдайда қаражаттың көзделген мақсатқа сай жұмсалуы талап етілмейді. Яғни ата-анасы немесе басқа да заңды мұрагері саналатын азамат қаражатты өз қалауынша жұмсай алады", – деп түсіндірді ол.
Бұған дейін қор өкілі Ұлттық қорда қаражат таусылып қалса бала ақшасыз қала ма деген сұраққа жауап беріп, қор ақшасын, керісінше, көбейту көзделіп отырғанын айтқан еді.