Қазақстандағы топ-5 үздік туристік ауылдар анықталды

Kazakh Tourism еліміздегі үздік туристік ауылдарды анықтап, 2026 жылғы "Үздік туристік ауыл" байқауының қорытындысын жариялады. Тізімге табиғаты мен тарихи-мәдени мұрасы ерекше бес елді мекен енді. Бұл туралы Stan.kz ақпарат агенттігі хабарлайды. 

2026 жылғы топ-5 тізімге "Алтын-Емел" ұлттық паркі маңы, Баянауыл өңірі, Берел қорғандары мен Имантау көлі жағасындағы ауылдар енді. 

Торайғыр ауылы

Павлодар облысындағы Торайғыр ауылы Баянауыл ұлттық паркінде, аттас көлдің жанында орналасқан. Ауыл қазақтың ақыны әрі ағартушысы Сұлтанмахмұт Торайғыровтың есімімен аталады. Мұнда гранитті жартастар, қарағайлы орман және ерекше табиғи ландшафттар бар. Көлде сазан, табан (карась), тұқы (карп) сияқты балықтар кездеседі.

Басшы ауылы

Жетісу облысындағы Басшы ауылы "Алтын-Емел" ұлттық паркінің солтүстік қақпасы саналады. Бұл жерден туристер Әншіқұм, Ақтау таулары, Катутау жотасы және Бесшатыр қорғандарына сапар шегеді. Ауылда қонақ үйлер мен кемпингтер жұмыс істейді. Сондай-ақ экскурсиялар мен жергілікті шеберханаларға бару мүмкіндігі қарастырылған. 

Берел ауылы 

Шығыс Қазақстандағы Берел ауылының маңында әйгілі Берел қорғандары орналасқан. Бұл – сақ дәуірінің ірі археологиялық кешендерінің бірі. Мәңгі тоңның арқасында ежелгі бұйымдар, киімдер мен ат әбзелдері жақсы сақталған. Бірқатар қорымдар ашық аспан астындағы музейге айналған.

Коробиха ауылы

Қатонқарағай ауданындағы Коробиха ауылы бухтармалық ескі сенім өкілдерінің қонысымен байланысты. Мұнда дәстүрлі ауыл келбеті сақталған. Шағын қонақ үйлер жұмыс істейді. Туристер жергілікті шіркеу мен мектеп музейін көре алады. Ауылда омарта шаруашылығы дамыған. Сондықтан агротуризм үшін қолайлы.

Имантау ауылы

Имантау ауылы СҚО-дағы аттас Имантау көлінің жағасында орналасқан. Бұл – танымал демалыс орны. Мұнда шомылу, балық аулау және қайықпен серуендеу дамыған. Соңғы жылдары этноүйлер мен экоқонақ үйлер көбейіп, глэмпинг және автотуризм бағыттары да дамып келеді.