Таразда үш айлық бала мінген көлік шұңқырға құлап кетті: Отбасы мүшелерінің жағдайы туралы не белгілі
Тараздық дәрігерлер көлікпен бірге шұңқырға құлап кеткен екі баланың өмірі үшін күресіп жатыр. Екеуінің де бас сүйегі сынған, миы ісінген. Олардың бірі қазір жансақтау бөлімінде жатыр. Балалардың әкесі мен анасы да ауруханада жатыр. Бұл туралы Stan.kz ақпарат агенттігі хабарлайды.
Фото видеокадрдан алынған
Тараз көпсалалы ауруханасының травматология және ортопедия бөлімінің басшысы Ерлан Төлеев науқастардың жағдайы қандай екенін айтып берді.
“Ер адамның төбе сүйегі сынған, бас миының жабық жарақаты, миы шайқалған, екі білегінің бірнеше рет көгерген жарақаттары бар. Түскен кезде науқасқа шұғыл ота жасалды. 1995 жылы туған науқаста қабырғасының көптеген сынықтары, оң жақтағы үш қабырғасының, сол жақтан екі қабырғасының сынуы, өкпенің зақымдануы жоқ, басының көп жарақаттары көгерген, көз алмасының контузиясы бар”, – деді дәрігер.
Оқыс оқиға орталық көшелердің бірінде болған. Онда жылу қызметкерлері желіні ауыстырып жатқан. Куәгерлердің сөзінше, жол белгісі болмағанын, сол себепті көлік иесі байқамай, шұңқырға құлап кеткен.
Балаларға (біреуі әлі үш айға толмаған, екіншісі небәрі алты жаста) бас сүйегі мен аяқ-қолының сынуы диагнозы қойылған. Дәрігерлер біреуінің жағдайын өте ауыр деп бағалап отыр.
“Мердігерге қатысты "Магистральдық құбырларды салу, пайдалану немесе жөндеу кезінде қауіпсіздік ережелерін бұзу" бабы бойынша қылмыстық іс қозғалды. Тергеуге дейінгі тексеру жүргізіліп жатыр. Жол белгілерін елемегені үшін жүргізуші де әкімшілік жауапқа тартылады”, – деді Жамбыл облысы бойынша жол-көлік полиция департаментінің басшысы Жайдарбек Құттыбаев.
Еске салайық, 12 маусымда Алматы-Шелек-Қорғас автожолының 105 шақырымында жол-көлік апаты тіркеліп, салдарынан 4 адам көз жұмғанын жазған едік. Алматы облысы полициясының дерегінше, Toyota Hiace жүргізушісі рөлді басқара алмай қалған.