"Сүйектері сынып, ми жарақатын алған": Алматылық дәрігерлер 9-қабаттан құлаған әйелді аман алып қалды
Алматыда №7 қалалық клиникалық аурухананың дәрігерлері тоғызыншы қабаттан құлаған 34 жастағы әйелдің өмірін сақтап қалды. Ол ауыр жағдайда түсті, сүйегі сынып, ауыр ішкі жарақаттар диагнозы қойылды. Бұл туралы Stan.kz ақпарат агенттігі хабарлайды.
Дәрігерлер оған ми жарақаты, ауыр кеуде жарақаты, көптеген қабырғалардың сынуы, пневмоторакс және гемоторакс диагнозын қойды. Әйелдің жамбасы, сан сүйегі және иық сүйегі сынды.
Әйел комаға түсіп, өлім қаупі жоғары травматикалық шок алды.
Ауруханаға жатқызылмас бұрын да жедел жәрдем бригадасы интубация жасап, шокқа қарсы терапияны бастады. Әйел ауруханаға жеткізілгеннен кейін оған қажетті жедел көмек көрсетілді. Жарақаттарының ауырлығына байланысты емдеуге әртүрлі сала мамандары тартылды.
№7 қалалық клиникалық аурухананың директоры Нұрдос Қадырбеков әйел бастапқыда жансақтау бөлімінде емделгенін, онда дәрігерлер ауыр шок пен көптеген жарақаттардың салдарын емдегенін айтты. Жағдайы тұрақтанғаннан кейін ол көп жарақат бөліміне ауыстырылды.
Науқастың аяқ-қолына, ал екі күннен кейін жамбас сүйектеріне бір уақытта операция жасалды.
"Топтық жұмыс пен сауатты емдеу стратегиясының арқасында біз оң нәтижеге қол жеткізе алдық. Жарақаттарының ауырлығына қарамастан, ауруханаға түскеннен кейінгі жетінші күні дәрігерлер науқасты арнайы жабдықты пайдаланып, көлденең қалыптан тік қалыпқа біртіндеп ауыстыра бастады", – деп мәлімдеді №7 қалалық клиникалық аурухананың көп жарақат бөлімінің меңгерушісі Рамазан Әскеров.
Оныншы күні әйел ауруханадан шығарылды. Ол міндетті медициналық сақтандыру жүйесі бойынша барлық медициналық көмек алды.
Еске салсақ, Алматыда дәрігерлер бесінші қабаттан құлаған төрт жасар баланы аман алып қалды.
Жамбыл облысында ер адам аяғы ауыр әйелін молаға апарып ұрып-соқты деп айыпталды
