"Сол жерде қаза тапқаным жақсы болар еді": Төбелес кезінде өзін қорғау үшін абайсызда адам өлтірген Жоламан Құсайын оқиғаның қалай болғанын айтып берді
Павлодарлық 21 жастағы Жоламан Құсайын 23 жастағы Сергей Сухоносенконың өліміне байланысты 4,5 жылға бас бостандығынан айырылған. Төбелес 2024 жылдың тамыз айында болған. Бірақ жанжалдың бейнежазбалары кейінірек интернетте таралып, оқиға оң шешімін тапты. Кейін сот істі қайта қарап, Жоламанды қамаудан босатты. Бұл туралы Stan.kz ақпарат агенттігі Tengrinews.kz порталына сілтеме жасап хабарлайды.
Фото: Видеодан скрин
Жоламан Құсайын мен оның адвокаты Ерлан Ғазымжанов сот үкімі, істің қайта қаралуы және оқиғаның тасада қалған тұстары туралы айтып берді. Қайғылы оқиға өткен жылдың жазында Павлодардағы түнгі бардың алдында болған. 23 жастағы Сергей Сухоносенко мен 21 жастағы Жоламан Құсайын арасындағы төбелес қайғылы аяқталып, Сергей қаза тапты. Ал Жоламан сот алдында жауап берді.
Сот-медициналық сараптама марқұмның өліміне ауыр бас-ми жарақаты мен миға қан құйылу себеп болғанын анықтады. Құсайынға Қылмыстық кодекстің 106-бабының 3-бөлігі бойынша айып тағылды (Денсаулыққа қасақана ауыр зиян келтіру, абайсызда жәбірленушінің өліміне әкеп соғу). Бірінші сот инстанциясы Жоламанды 4 жыл 6 айға бас бостандығынан айырды. Прокурорлар мен марқұмның анасы 8 жылға бас бостандығынан айыруды талап етті.
Кейін интернетте төбелестің бейнежазбасы таралып, оқиғаға басқа көзқарас пайда болды. Бейнебақылау камералары 23 жастағы жігіттің әуелі екі жас жігітке жақындап, кейін алыстап, қайта келіп, олардың біріне тап бергенін түсіріп алған. Оның қолында жазылатын пышақ болған, бірақ кейін оны қалтасына салып қойған. Бұдан соң жастар арасында төбелес басталған. Жанжал басылғанымен кейін Сергей Сухоносенко құлап қаза тапты.
"Салмағым 55 келі, ал ол шамамен 80 келі еді. Жақында ғана әскерден келген. Физикалық тұрғыдан мықты еді. Өте мас болғанын түсіндім және жай ғана төбелескісі келгенін байқадым. Оны тыныштандыруға тырыстым. Сергей пышағын шығарғанда, мені жаралағысы келетінін түсіндім. Сергей "Сені өлтіремін" деп айтқан. Шегіндім, бірақ ол қайта-қайта жақындап, пышақпен қорқытты. Өмірім үшін қорықтым. Жігіт мені әдейі таңдады, себебі айналамдағылардың ішінде ең әлсізі мен болдым", – деді Жоламан Құсайын.
"Өзіме сенімді болдым. Өйткені қорғанғанымды білдім және мені босатуы керек деп ойладым. Сол күні-ақ босататын шығар деп үміттендім. Өкінішке қарай, бәрібір 106-баптың 3-бөлігімен айыптады. Бұл бап бойынша ең аз жаза 8 жылдан басталады. Шок алдым. Не болып жатқанын түсінбедім. Не істерімді, қалай әрекет ететінімді білмедім. Үш айдан кейін сот басталды. Сотта мені босатады деп үміттендім. Бірақ 14 сот отырысы өтті. Сухоносенконың анасын көрдім. Әйелдің баласы қаза тапқандықтан, оған жаным ашыды", – деп еске алды Жоламан.
Бірінші инстанция сотында Жоламан Құсайынды 4 жыл 6 айға бас бостандығынан айырды.
"Судья "4 жыл 6 ай бас бостандығынан айыру" деп үкім оқыды. Осы сәтте өмірім аяқталғандай сезіндім. Сол жерде өзімнің қаза тапқаным жақсы болар еді. Сухоносенко мені жарақаттаса, бәрі жеңіл болар еді. Сол жерде тыныш жатсам, туыстарым бұлай азап шекпес еді. Жақындарым екі ай жылап, сосын мені жоқ деп қабылдар еді. Ал мен болсам, бұл кезде өмірден күдерімді үздім", – деп бөлісті Жоламан.
Үкім шыққаннан кейін Жоламанды жазасын өтеуге жөнелтті.
"Таңертеңгі тексерісте түрме қызметкерлері маған қарап, бейнежазбаны көргендерін айтты. Кейін белгілі болғандай, видео интернетке жүктелген екен. Сот менің кінәсіз екенімді және жақында босатылатынымды айтты. Сол кезде көңіл-күйім сәл көтерілді. Әкем келіп, басқа адвокат жалдағанын айтты", – деді Жоламан.
Еске салайық, бұған дейін қайғылы оқиға былтыр 11 тамызда Павлодардағы "Гоголь" түнгі клубының жанында болған. 23 жастағы жігіт өзі алдымен екі жас жігітке жақындап, олардың біріне шабуыл жасаған. Оның қолында пышақ болған, кейін оны қалтасына салып қойған. Апелляциялық сот салмағы өзінен 20 келі кіші жігітке пышақпен шабуылдаған павлодарлық тұрғынның өліміне қатысты тергеуді қайта бастаған еді.