"Өмірімнен сызып тастадым": Бибігүл Төлегенова отбасылық өмірде бағы жанбағанын айтты
КСРО халық әртісі, бұлбұл дауысты әнші Бибігүл Төлегенова жан сырын ақтарды. Бұл туралы Stan.kz ақпарат агенттігі “Таңшолпан” бағдарламасына сілтеме жасап хабарлайды.
Фото: Бағдарламадан скриншот
95 жасқа аяқ басқан әнші өмір жолынан сыр шертті. Өнер жолын таңдауына әкесі рұқсат бергенімен, анасы қарсы болған.
“Жалпы біздің әулеттің адамдары – өнерлі жандар. Әкем скрипкада жақсы ойнаған. Анам да өнерден құр алақан емес. Сол кезде ауыл адамдарының әртіс дегенге көзқарасы түзу болмады. Әртіс адамдар бұзылып кетеді деп ойлайтын. Анам үзілді-кесілді қарсы болды. Қызының “бұзылып кетіпті” деген өсегінен қашқан болуы керек. Маған "Сен өнерге кетсең бәрібір оқымайсың, күйеуге шығасың да, бала туып, үйде отырасың" деді. Бірақ, менің соншама құштарлығым болды. Өмірімнің барлық киындығын өз әнімнің арқасында жеңдім. Әнімнің арқасында көтерілдім, сүйікті болдым, жігіттер де ғашық болды. Егер әнші болмасам бәлкім, қазіргідей керемет әже болып отырмас едім”, – деп ол өнерге алғаш аяқ басқан кезін еске алды.
Сонымен қатар өнерде жолы болғанымен отбасылық өмірде сәтсіздікке ұшырағанын да жасырмады.
“Менің өнеріме қолдау білдірген бір-ақ адам болса, ол – Ахмет Жұбанов. Күйеулерімнің ешқайсысы өнерімді қолдамаған. Оларға үйде отыратын әйел керек болды. Тіпті бірімен заңды некеге де тіркелген жоқпыз. Бірінші жұбайымен ажыраспаған екен. “Семейге алып кетемін, маған Алматыда жұмыс жоқ” деп айтты. Жалпы еркектерден бағым жанбады. Олар туралы қазір мүлдем сөз қозғамаймын. Кітабыма да жазбадым. Оларды есіме де алғым келмейді”, – дейді халық әртісі.
Еске салайық, мемлекет басшысы Қасым-Жомарт Тоқаев халық әртісіне мемлекеттік стипендия тағайындағанын жазған едік.