"Қазақфильм" жер телімінің сатылғаны және кіруге бақылаудың күшейтілгені туралы ақпаратты жоққа шығарды
"Қазақфильм" желідегі парақшасында киностудиядағы жер учаскесін сату және өткізу режимінің қатаңдатылуы туралы ақпарат шындыққан жанаспайтынын жария етті. Бұл туралы Stan.kz ақпарат агенттігі хабарлайды.
Фото: google.com
Шәкен Айманов атындағы "Қазақфильм" киностудиясы соңғы күндері Рысқұлов даңғылы, 101Б мекенжайында орналасқан жер учаскесі мен бұрынғы "Қазкино" кешенін сату туралы таралған ақпарат шындыққа жанаспайтынын мәлімдейді.
“Қазір учаске мен ғимарат киностудияның меншігінде және сатуға шығарылмайды. Аталған учаскеде авариялық жағдайда тұрған ғимарат анықталды. Бұл киностудия мамандарының бірнеше рет жүргізген тексерулерінде расталды. Аумақтағы қауіпсіздікті қамтамасыз ету және жазатайым жағдайлардың алдын алу мақсатында "Қазақфильм" Алматы қаласы әкімдігінің өкілдерін тарта отырып, кешенді сараптама жүргізуді бастады", – деп жазды киностудия.
Олардың мәліметінше, сарапшылардың қорытындысы бойынша осы ғимаратты қауіпсіз пайдалану үшін қажетті шешімдер қабылданады.
"Жер учаскесі мен кешенді сату туралы барлық ақпарат жалған. Бұл жалған ақпарат ары қарай таралған жағдайда сотқа жүгінуге құқығымыз бар. "Қазақфильм" киностудиясының аумағындағы өткізу режимінің қатаңдатылуы туралы хабарламалар да шындыққа жанаспайды. Қолданыстағы өткізу жүйесі қызметкерлердің қауіпсіздігін қамтамасыз етуге және киностудия мүлкін қорғауға арналған. Мұндай шаралар әлемдегі барлық киностудияларда қалыпты тәжірибе болып саналады және ұрлық, өртеу және басқа да оқиғалардың алдын алу үшін қажет. Жақында енгізілген қауіпсіздік шаралары студия аумағында болған өрт пен қызметкерлерге жасалған шабуыл сияқты оқиғаларға жауап ретінде жасалып, студияда жұмыс істейтіндердің барлығын қорғауға бағытталған", – делінген хабарламада.
Сонымен қатар олар киножобаларды қаржыландыру туралы ақпаратты түсіндіруді жөн көрген. Киностудияның дерегіне сенсек, 2023 жылы Ұлттық киноны қолдау мемлекеттік орталығы 18 жобаны өндіріске жіберіп, 10 шақтысының 70%-дан астамы қаржыландырылған.
"Соның ішінде екі жоба 100% қаржыландырылды. Ал қалған сегіз жоба 50%-дан төмен қаржыландыру алды. Алайда олардың бірқатарына аралық төлемдер жасалды. Кейбір жобаларды қаржыландырудың кешігуі Қазынашылық комитеттің кеш қаржы бөлуімен байланысты. Сонымен қатар кешіктірілу есептердің уақытылы тапсырылмауымен де байланысты, бұл келесі транштарды алу үшін қажетті шарт. "Қазақфильм" киностудиясы жалған ақпарат тарату Қазақстан Республикасының заңнамасына сәйкес жауапкершілікке әкелетінін еске салады. Біз ақпарат беруде дәлдікті сақтауға шақырамыз және беделімізді қорғау, жалған мәлімет таратқандарды жауапқа тарту үшін тиісті органдарға жүгінуге құқылымыз", – деп түсіндірді киностудия.
Еске салайық, бұған дейін “Қазақфильм” қызметкерлері еңбекақы алмай жүргендеріне бір жыл болғанын айтып, бейбіт шеруге шықты. Аниматор мамандар киностудия басшысы Азамат Сатыбалдыдан соңғы бірнеше жылғы еңбегінің ақысын талап етіп отыр.