Қасым Аманжолов: Екі университетке ректор болған 62 жастағы Түймебаев пен 64 жастағы Сыдықов не бітіреді?

Белгілі журналист, тележүргізуші Қасым Аманжол екі үлкен университетке басшылыққа келген тұлғаларды сынға алды. Журналист жасы келген қариялардың орнына білімді жастарды қою керек деген  пікір айтты. 

"Шалдары шегінбейтін қоғамда өмір сүріп жатырмыз. Жақында екі ірі универдің, екі ірі газеттің басшысы тағайындалды. Бәрі алпысты алқымдағандар. Қарияға қастығым жоқ, бірақ, 62 жастағы Түймебаев, 64 тегі Сыдықов өз потенциалдарын көрсетіп болды емес пе? КазГУ-ды КазГУ қылған Өмірбек Жолдасбеков 39 жасында ректор болған екен. Сол Жолдасбековтердің жолын жалғасын деп қанша жасты мемлекет Болашақпен оқытпады ма? Қырықтың ар жақ, бер жағындағы, білімі мен білігі толысқан, бабында жүрген қаншама азамат бар. Олардың обалы, олар беруге тиіс нәтиженің обалы кімге? Тіпті, жақында басы дауға қалса да Саясат Нұрбек сияқты білімді мамандар көп жұмыс атқара алар еді деп ойлаймын", - деп жазды Қасым Аманжолов. 

Журналист мырза газетке басшылыққа келген Қали Сәрсенбай мен Данияр Төреханның да тағайындалуы орынсыз деген ойын айтты.

"Ал екі газет ше? "Ана тіліне" Жанарбектің орнына келген, 62 дегі Қали Сәрсенбай ағамыз не істей алады? Рас, жақсы адам, еңбекқор журналист, кісілігі зор. Алайда, көрсетерін көрсетті, берерін берді ғой. Қалекеңнің орнына "Алматы ақшамына" Данияр Төрехан деген алпысты алқымдаған ағамыз келіпті. Не істейді, нені өзгертеді, түсіне алмайм... Журналистикада жиырмасы мен отызында өздерін дәлелдеп тастаған Сәкен Сыбанбай, Жұлдыз Әбділда, Кәмшат Тасболат, Есей Жеңісұлы, Руслан Ерботалар ше? Мүмкіндік берілместен, бауырын жазып шаппастан қартаятын болды ма... Аты аталған-аталмаған қанша мықты профилер бар.

Бір кезде Алтынбек министр болғанда отызға енді ілінген курстастары мен достары — Нұртөре, Шәмшиддин, Серғазы, Жүсіпбек т, б. қаншама азаматты редактор, замредактор етті. Олар шынымен мықты жұмыс атқарды. Өз кезеңінде. Енді сәл шегінуге, жол беруге мәрттігі жетпейтініне таң қаламын. Медиа саласының кураторы боп отырған Абаев, Балаева, Уәлилердің қазақ журналистикасы, өз замандастары жайлы түсініктеріне қайранмын", - деді Қасым Аманжол.

Айта кетейік, әл-Фараби атындағы Қазақ ұлттық университетіне Түймебаев Жансейіт Қансейітұлы басшылыққа келді. Ерлан Сыдықов Л.Н. Гумилев атындағы Еуразия ұлттық университетінің ректоры болып тағайындалды.