Аналардың бірі баласының мүгедек балаларға арналған арнайы орталықта жарақат алғанын айтып берді. Сондай-ақ баласының денесінде көгерген іздер пайда бола бастаған. Ал жаппай улану орын алар алдында ұлының мұрны сынған.

"Менің балам осы орталықтың күндізгі бөлімінде алты жылдай, ал тәуліктік бөлімде бір жарым жыл оқыды. Баламның мұрны сонда сынған. Мен Құқық қорғау комиссиясына жүгіндім. Ұлым ауырған 10 жыл ішінде полицияға, прокуратураға, адам құқықтары жөніндегі комиссияға 6-7 рет жүгіндім. Ал біз, ана ретінде балаларымызды қорғау үшін мықты болуымыз керек.

Менің өтініштерімнен кейін біреу жазаланған шығар. Бірақ жүйелік мәселелерді ешкім шеше алмады. Өйткені ол жерде балалар кадр тапшылығынан өздерін және бірін-бірі жарақаттап жатады. Себебі қызметкерлер жетіспейді. Осы мәселенің шешімін тапқанын қалаймын", - деді зардап шеккен баланың анасы.

Жұмыспен қамту және әлеуметтік бағдарламаларды үйлестіру басқармасы жағдайға қатысты түсініктеме берді. Мұрны сынған бала арнайы орталықтың басқа тәрбиеленушісімен төбелесіп жарақат алған.

"Оқиға 22 маусымда болды. Анасы БАҚ өкілдеріне хабарласқан бала тәрбиеленушілердің бірін басымен ұрды. Екінші бала оған жауап ретінде бетінен соқты. Мұғалімдер уақытында әрекет етіп, балаларды бөліп әкетті. Осыдан кейін оқиға анасына жеткізілді.

Орталық қызметкерлері зардап шеккен баланы емдеу мекемесіне, Мақажанов атындағы көпсалалы ауруханаға жеткізді. Баланы ауруханаға жатқызбай үйден емдеу ұсынылды. Бала орталықта ем қабылдады. Сол күні баланың анасы құқық қорғау органдарымен орталыққа келді. Орталық әкімшілігі бейнебақылау камераларының жазбаларын берді. Бұл оқиға орталықтың бейнекамерасына түсіп қалған", - деді Қарағанды облысының жұмыспен қамтуды үйлестіру және әлеуметтік бағдарламалар басқармасының басшысы Ерсін Сәкен.

Қарағанды облысы әкімдігінің баспасөз қызметі полиция бұл факті бойынша қылмыстық іс қозғамағанын жеткізді.

Еске сала кетейік, бұған дейін Қарағандыда балалар жаппай уланып жатқаны туралы жазған едік.

Талқылау