Елдос Сметов Qazaqstan Barysy Grand Slam турнирінің қола жүлдесіне таласады

Олимпиада ойындарының екі дүркін жүлдегері Елдос Сметов Астанада өтіп жатқан соңғы лицензиялық Grand Slam турнирінің қола жүлдесі үшін белдеседі. Бұл туралы Stan.kz ақпарат агенттігі хабарлайды.

Қазақтан шыққан тұңғыш әлем чемпионы Елдос Сметов Астанада өтіп жатқан Qazaqstan Barysy Grand Slam әлемдік жарысының қола жүлдесі үшін белдеседі. 60 келіде белдесетін отандасымыз алғашқы айналымда португалиялық Родриго Лопесті, екінші кезеңде Юнес Саддикиді айқын басымдықпен ұтқанмен, ширек финалда ресейлік Рамазан Абдулаевқа есе жіберіп, алтын жүлдеден қағылды. Дегенмен жұбаныш белдесуде Айбек Омировті “иппонмен” жеңіп, қола жүлдеге күресу мүмкіндігіне ие болды. Қола жүлде үшін белдесуде әзірбайжан Ахмад Юсифовқа қарсы күреседі.

Айта кетейік, Сметов соңғы рет Ташкентте өткен Grand Slam турнирінде сынға түсіп, ширек финалда грузин балуаны Лухум Чхвимианиге есе жіберген еді.