Бұл техникалық тұрғыдан мүмкін, бірақ саяси тұрғыдан қиын болады. CNN арнасының тікелей эфирінде өткен бір жарым сағаттық телекөпір АҚШ-тың 81 жастағы президенті Джо Байденнің шама-шарқын көрсетіп берді. Оның сөзі басында фактілерге толы болды және көші-қон, түсік жасаудан бастап, Украинаға дейінгі ішкі және сыртқы саясаттың негізгі мәселелері бойынша өзінің саясаты мен ұстанымының контексті мен егжей-тегжейін түсіндіруге тырысты.

Бірақ дауысы нық шықпай, сенімсіз болып көрінді. Пікірталас аяқталғаннан кейін либералды комментаторлар мен саяси технологтар бірінен соң бірі басқа кандидат ұсынуға белсене кірісіп кетті деп жазды New York Times.

“Трамп Байденге қарағанда әлдеқайда жігерлі және сенімді көрінді бірақ ол өтірік бұрмаланған фактілермен сөйледі. Сөзін қарсыласын айыптап, төпелеумен бастады”, — деп жазды газет.

Трамп алдыңғы сайлауды бұрмаланған деп санаған еді. Алайда сот оның барлық талабында дәлел жоқ болғаны үшін дауыс беру қорытындыларының күшін жою талабын қабылдамаған.

"Агрессивті жындану". CNN Байденнің партияластарының көңіл-күйін осылай сипаттады. Ал Atlantic журналы "Джо Байденнің құлдырауы" деген тақырыпта мақала жариялады.

Пікірталастан кейін бірден Нью-Йорк Таймстың ықпалды колумнисті Николас Кристоф Байденді номинациядан бас тартуға және саяси мансабын аяқтауға шақырды. Демократтарға түсіністікпен қарайтын, Байденді бұрыннан жақтайтын басылым бірден бірнеше баған шығарды. Байденнің 81 жасын үнемі бетіне басатындар, Трамптың одан небәрі үш-ақ жас кіші екенін ұмытқандай.

Пікірталаста не айтылды?

Байден бұл жолы ақырын және әлсіз дауыспен сөйледі. Ал пікірталастың алғашқы 15 минутында сұраққа бірнеше секунд ойланып барып жауап беріп, не айтқысы келетінін еске түсіруге тырысты. Трамп, керісінше, қарсыласымен және жүргізушілерімен үнемі жанжалдаспады. Ол қысқа жауап берді және сөз үшін таласпады.

Бұған олардың ұйымдастырушысы CNN телекомпаниясы ұсынған пікірталастың жаңа ережелері де ықпал етті: үміткерлер жүргізушілерге қатаң түрде жауап берді. Ал біреуі сөйлеген кезде екіншісінде микрофон автоматты түрде өшіп, қарсыласпен бір уақытта сөйлесу мүмкіндігі болмады. Экономика, денсаулық сақтау, есірткі трафигі және тіпті түсік тастау туралы сұрақтарға жауап бере отырып, Трамп Байденді көші-қонның өсуі үшін сөгуді ұмытпады.

Жүргізушілер үміткерлерге “Ресей президенті Владимир Путиннің Украинадағы соғысты тоқтату шарттарын қабылдауға дайын ба?” деп сұрақ қойды. Ал Байден бұл мүмкіндікті жоққа шығарды. “Егер Путинге Украинаны басып алуға рұқсат етілсе, ол мұнымен тоқтап қалмайды және Польша сияқты НАТО-ға мүше Шығыс елдеріне шабуыл жасайды” деді.

Жүргізушінің сұрағына Трамп бұлтарып жауап берді. Кейін қайталап сұрағанда Путиннің шарттарын қабылдамайтынын айтты. Бірақ егер ол сайлауда жеңіске жетсе, соғысты бірнеше ай бұрын, тіпті инаугурацияға дейін аяқтайтынына уәде берді” деп қосты. Ол Ресейде жалған тыңшылық бойынша сотталған Wall Street Journal журналисі Эван Гершкович туралы да солай айтты.

Трамп сонымен қатар Украина президенті Владимир Зеленскийді Байден әкімшілігінің Киевке көмек пен қолдау көрсетуге бөлінген миллиардтаған долларларға түсініктеме бермеген "әлемдегі ең жақсы саудагер" деп атады.

Байден Трамптың бұрынғы сәтсіз сотын, әлеуметтік желіден аластатылғанын еске салды.
Ал Трамп оның жеке өміріне шүйлігіп, қарсыласының ұлы Хантер Байденнің жыныстық жанжалмен аты шыққанын және жақында қаруды заңсыз сақтағаны үшін сотталғанын айтты.

"Мен өмірімде ешқашан мұндай бос сөздерді естіген емеспін", — деді Байден.

Экономикаға қатысты пікірталастардың бір бөлігі негізінен кімнің дұрыс және кім кінәлі екені туралы дауға байланысты болды және екі үміткер де бірқатар қате мәлімдемелер жасады. Әсіресе, олар пандемиядан кейін жаңа жұмыс орындарын кім құрғаны туралы қатты дауласты. Байден Трамптың кезінде "экономика құлдырады, жұмыс орындары болмады" деп мәлімдеді және ол келіп, еңбек нарығын қалпына келтіргенін жеткізді.

Аборт пікірталастың маңызды бөлігі болды және Трамп өз ұстанымын егжей-тегжейлі түсіндіруге тырысты. Сайлаушыларын түбегейлі қорқытқысы келмеген ол түсік жасатуға толық тыйым салуды қолдамайтынын айтты.

Дәстүр бойынша, екі партия да президенттікке басқа үміткерлерді қарастырмай-ақ, оларға екінші мерзімге сайлануға мүмкіндік береді. Байден жақтастары, яғни, демократиялық партияның съезі Чикагода тамыздың ортасында, дауыс беру күніне үш ай қалғанда өтеді. Нақты шешім сол кезде белгілі болады.

Талқылау