БЖБ мен ТЖБ-дан бас тарту мәселесі: Депутат бұл жүйені енгізген шенділерді жауапқа тартуды ұсынды

Мәжіліс депутаты Ирина Смирнова мектептерде БЖБ мен ТЖБ-дан бас тарту мәселесіне қатысты пікір білдіріп, егер бұл жүйе тиімсіз деп танылса, оны енгізуге жауапты болған шенеуніктер есеп беруі керек екенін айтты. Бұл туралы Stan.kz ақпарат агенттігі хабарлайды.

Мәжіліс депутаты Ирина Смирнова кей сыныптарда бөлім бойынша жиынтық бағалау (БЖБ) мен тоқсандық жиынтық бағалаудан (ТЖБ) бас тарту мүмкіндігіне қатысты пікір білдірді.

Оның айтуынша, бұл жүйені енгізуге қомақты қаражат жұмсалғандықтан, егер шешім қате болғаны анықталса, оны енгізген шенеуніктер жауап беруі керек.

"Бүгін енгізіп, ертең алып тастай салуға болмайды. Мұндай шешім жан-жақты талдау, талқылау және сарапшылардың қорытындысы негізінде қабылдануы тиіс. Бұл бір адамның шешімі болмауы керек", – деді депутат.

Оқыңыз

Қазақстандық оқушылар диктант, шығарма мен мазмұндамаға қайта оралды 

Смирнова мұндай өзгерістердің себептері қоғамға ашық түсіндіріліп, "Неліктен бұл жүйеден бас тартылады?" және "Оны енгізгендер жауап бере ме?" деген сұрақтарға нақты жауап берілуі қажет екенін атап өтті.

Сондай-ақ депутат бұрынғы бес балдық бағалау жүйесінде іс жүзінде 3, 4 және 5 деген бағалар ғана жиі қойылғанын айтып, БЖБ мен ТЖБ-ның да белгілі бір оң тұстары болғанын жеткізді.

Еске салайық, 26 мамырда Жұлдыз Сүлейменова қазақстандық мектептерде БЖБ мен ТЖБ-дан біртіндеп бас тарту мүмкіндігі қарастырылып жатқанын мәлімдеген еді. Оқу-ағарту министрлігі ТЖБ және БЖБ бойынша кең ауқымды талдау жұмыстарын жүргізіп жатыр, себебі бұл білім беру стандарттарында белгіленген, критерийлерге негізделген бағалау. Қазір біз бөлек бағалауларды енгізіп жатыр. Диктант, шығарма жазу, мазмұндамалар. Сондықтан министрлік ТЖБ-дан біртіндеп бас тартуды ойластырып жатыр.