"Боссың ба?": Салтанат өлім аузында жатқанда Бишімбаев басқа әйелмен сөйлескен

Сот Айжан Құлбаева Қуандық Бишімбаевтың телефонын тексеріп отырып 2023 жылы 9 қараша күні сотталушының “Юлия супер” деп сақталған әйелмен хат жазысқанын анықтады. Бұл туралы Stan.kz ақпарат агенттігі хабарлайды.

Фото: Жоғарғы сот

Сотталушы Қуандық Бишімбаев мұның жеке басқа қатысты хаттар екенін ескертіп, ондағы әңгімені жарияламауды сұрады. Бірақ сотқа қатысушылар хаттардың оқылуын талап етті. Өйткені Бишімбаев “Юлия супермен” Салтанат Нүкенова өлім аузында жатқан сәтте сөйлескен.

“Не істеп жатырсың? Боссың ба”, – деп сұраған Қуандық Бишімбаев.

Оның бұл сұрағына “Юлия супер”: “Кірпік жабыстырып жатырмын. Қай уақытта?”, – деп жауап берген. 

Жәбірленуші тарап атап өткендей, Бишімбаев Салтанаттың жағдайы туралы көріпкелмен сөйлесіп жатқанда Юлиямен де қатар хат алмасқан. Жәбірленуші тараптың: “Юлия Бишімбаевқа қандай қызмет көрсетуі керек еді? Ол не себепті бос болуы керек?” деген сауалдарына сотталушы жауап бере алмады. Сот аталған сұрақтарды алып тастады. 

Бұған дейін Бишімбаев пен марқұм Салтанат Нүкенованың WhatsApp арқылы сөйлескен хаттарының скриндері оқылды. Онда Салтанат Бишімбаевтан үйге қайта оралуын сұраған.