“Салтанаттың басты арманы – ана атану еді. Бірақ бұл арман орындалмасқа кетті. Құрбыларының балаларының туған күні, тағы басқа мерекелерін қалдырмайтын. Салтанат кіндік шешесі болған балалар әлі күнге дейін оған қоңырау шалып, ол бір күні жауап береді деп үміттенеді”, – деді Айтбек Амангелді.

Сөзінше, биыл олардың ата-анасы 60 жасқа толады. Салтанат екеуі оларға сыйлық жасауды ойластырып жүрген.

“Бұл отбасыда бәрі бірге шешім қабылдап, болашаққа мақсат қоятын. Біліміне инвестиция құйды. Ата-анамызбен төртеуміз саяхаттаймыз деп ойладық. Менің ата-анам 60-қа толды, тағы да жастан жасқа жете береді, ал Салтанат мәңгі 31 жаста болып қалады”, – деді ол.

Айтуынша, Нүкенова ісіне адал болған, жұмысын шын көңілімен жақсы көріп, қыз-келіншектерге көмектесуді өз миссиясы деп санаған.

Сондай-ақ ол желіде Салтанатты қаралап жатқандарды сынады.

“Жарты жылда біз қайғырып та үлгермедік, өйткені қызу күрес пен майданда жүрміз. Марқұм жақынымыздың арын қорғап жүрміз. Түрлі қаралаған ақпараттың әрқайсысын жоққа шығарумен жүрміз. Өтірік – жаман адамдардың қаруы. Салтанаттың атын қаралауды доғарыңыздар”, – деді марқұмның ағасы.

Оның айтуынша, сотталушы тіпті кінәсін түсінген жоқ.

“Сот отырысында қисынсыз ойлар айтып, қалғып отыр. Ол өзін хан сезініп, өзінен төмендерді кемсітуді әдетке айналдырған. Ондай адам қатесін ұқпайды. Ол лайық жазасын алмаса, кейін одан да сорақысын жасайды. Одан адамдықты, өкінуді көріп тұрған жоқпын. Не айтса да, ол Салтанатты қинап өлтірді. Ол күні Салтанат қана өлген жоқ, ата-анамыздың рухы мен көз жанары да қоса өлді”, – деді ағасы.

Бұған дейін Қуандық Бишімбаевтың ісі бойынша сотта жарыссөз басталғаны айтылды. Мемлекеттік айыптаушы жарыссөз кезінде сотталушының жүрегі жоқ адам екенін баса айтты.

Талқылау