Артур Бетербиев төрешілер шешімімен Дмитрий Биволды жеңіп, бокстан абсолютті әлем чемпионы атанды
Сауд-Арабиядағы Эр-Риядта өткен бокс кешінде жартылай ауыр салмақтағы абсолютті әлем чемпионы атағы үшін жекпе-жекте Артур Бетербиев мен Дмитрий Бивол кездесті. Төрешілер шешімімен Артур Бетербиев бокстан абсолютті әлем чемпионы атанды. Бұл туралы Stan.kz ақпарат агенттігі хабарлайды.
Фото Артур Бетербиевтің желідегі парақшасынан
Жекпе-жек Эр-Рияд қаласында өтіп, 12 раундқа созылды. Ресейлік спортшылар Ресейдің Украинаға басып кіруіне байланысты енгізілген санкциялар салдарынан рингке басқа мемлекеттердің жалауларымен шықты.
Айта кетейік, Бетербиев үшін бұл жеңіс кәсіби мансабындағы 21-жеңіс болды. Биволмен кездесуіне дейін барлық жекпе-жектері нокаутпен аяқталған.
Ал Бивол алғаш рет жеңіліске ұшырады, оның есебінде 23 жеңіс бар, оның 12-сі нокаутпен. Осылайша Бетербиев WBA, WBO, WBC, IBF, IBO, The Ring сияқты алты белбеудің иегері атанды.
Еске салайық, бұған дейін 4 қазанда Жәнібек Әлімханұлы жеңілмеген жаңазеландиялық қарсыласын көкала қойдай етіп сабап, ауыр нокаутқа жіберді. Лас-Вегаста екі чемпиондық белбеу үшін жекпе-жек алдында салмақ өлшеу сәтінде есінен танып, ауруханаға түскен Әлімханұлы Андрей Михайловичке (21-1, 13 КО) қарсы екінші жекпе-жегінде жарқын жеңіске жетті. Аустралияның Сидней қаласында өткен жекпе-жекте отандасымыз әр раунд сайын қарсыласына ауыр соққыларын дарытып, ақыры 9 раундта қарсыласын сұлатып салды. Сөйтіп Әлімханұлы IBF тұжырымы бойынша чемпиондық белбеуін сақтап қалды.
