Алматыда электр қуаты жаппай өшті: Мегаполис не себепті жарықсыз қалды

Алматы қаласының 4 ауданында жарық өшті. Бұл туралы Stan.kz ақпарат агенттігі хабарлайды.

Жарық 14 тамыз күні сағат түскі уақытта өшті. Редакция “Алатау-жарыққа” компаниясына жарықтың сөні себебін сұраған болатын. Компания апаттық ажырату салдарынан өшіруге мәжбүр болғанынмәлімдеді.

“Сағат 14:38-де "KEGOC" АҚ-ға тиесілі 500 кВ Л-5400, Л-5300 және Л-5320 әуе электр беру желілерінің апаттық ажыратылуы нәтижесінде "Алатау Жарық Компаниясы" АҚ желілерінде апатқа қарсы автоматика (САОН, АЧР) іске қосылды, нәтижесінде Алматы қаласы мен Алматы облысындағы электр энергиясы өшірілді”, – деп жазды хабарламада.

Алматы қаласының 4 ауданында жарық сөнді, олар:

• Бостандық ауданы
• Наурызбай ауданы
• Әуезов ауданы
• Алатау ауданы 

Алматы облысы бойынша жарық өшкен:

• Жамбыл;
• Балқаш;
• Есік;
• Қарасай;
• Шелек;
• Райымбек;
• Ұйғыр;
• Іле;
• Кеген;
• Талғар аудандарында электр қуаты өшірілді.

Энергетиктер электрмен жабдықтауды қалпына келтірумен айналысып жатыр. Жарық қашан жанатыны әзірге белгісіз.

"Жетісу облысы, Ескелді ауданы, Шымыр ауылында жарық та, су да жоқ", – деп хабарлады оқырман.

Шымкент тұрғындары да жарықтың жоғын айтып, шағымданып жатыр.

Қырғызстан астанасында да жарық өшті

Сондай-ақ Бішкектің кейбір аудандарының тұрғындары электр қуатының сөніп қалғанын айтты. Kaktus.media басылымындағы әріптестердің мәліметінше, жарықтың өшкені туралы алғашқы хабарламалар шамамен сағат 15:00-де түскен. Тұрғындар Тыныстанов пен Тоқтоғұл көшелері маңында электр қуатына қатысты ақау болғанын айтқан.

Кейін Ибраимов – Бөкөнбаев, Абдрахманов – Ибраимов көшелері маңынан, "Аламедин-1" шағынауданынан, Сүйінбаев – Жібек Жолы көшелері қиылысынан, "Жастар кварталынан", Ахунбаев – Айтматов даңғылы маңынан, сондай-ақ Селекционное ауылынан жарыққа қатысты шағымдар түскен.

Сонымен қатар Қолбаев көшесінде, №70 мектеп маңында және Орозбеков – Түгөлбай Ата көшелерінің қиылысында да электр қуаты үзілген.