Ақтауда елеулі NAIZA 64 турнирі өтеді

Ақтау қаласында елеулі Naiza Fighting Championship 64 турнирі өтеді. Бұл туралы Stan.kz ақпарат агенттігі хабарлайды.

Ақтау қаласында өтетін Naiza Fighting Championship 64 турнирінде екі бірдей чемпиондық жекпе-жек өтеді. Кештің басты жекпе-жегінде жартылай жеңіл салмақтағы чемпиондық шайқас өтеді. Лига чемпионы Нұрбек Қабдрахманов (9-2, 6 SUB, 1 KO/TKO) бразилиялық азулы жауынгер Вандерлей “Мексикано” Левандовскиге (17-7, 8 SUB, 4 KO/TKO) қарсы титулын қорғайды. Бұған дейін Вандерлей NAIZA-ның бірден екі салмақ дәрежесінің чемпионы атануға ниетті екенін мәлімдеген.

Екінші басты жекпе-жекте минималды салмақтың белбеуі үшін тарихтағы IMMAF тұжырымының ММА бойынша тұңғыш үш дүркін әлем чемпионы Бағдат Жұбаныш (4-1, 2 SUB, 1 KO/TKO) пен GAMMA тұжырымы бойынша әлем чемпионы Дооронбек Кылычбек уулу (4-0, 3 SUB) шайқасады.

Сонымен қоса, негізгі кардта Еламан Шертаев пен (10-2, 3 SUB, 3 KO/TKO) бразилиялық нокаутшы Тарцизио “Педра” Гомес (10-5 2 SUB, 8 KO/TKO) шайқасады. Тарцизио қазақстандық көрермендерге Сәбит Жүсіповке қарсы өткізген жекпе-жегімен танымал. Сол айқаста Гомес қарсыласын 1-ші раундта нокаутқа жіберген еді.