Ботаның көз жасына себепкер өзге емес, өзіміздің қаракөз қазақ екен. Өзі солай дейді. Айтуынша, 16 жыл өмірі құлдықтың құрсауында өтіпті. "Жетім деп жасымды сүрткен жан болмады, керісінше бәрі басынды, еңбегімді қанады, одан қалды тонады" дейді.

"Алғашқыда Үштөбе қаласындағы балалар үйінде тұрдым. Психология-медицина-педагогикалық консультация кезінде менен "Ұшақ пен тікұшақтың айырмашалығы қандай?" деп сұрады. Ол кезде 4-ші сыныпта оқимын. Жауабын білсем де, ұялып, айтқым келмеді. Осыны пайдаланып, "ақыл-есі кем" деген анықтама қағазы берілді", - деді Бота Сүлейменова.

Осы сынды тексерістер алдында балалар үйіндегі тәрбиешілер "өзіңді жынды етіп көрсетсең, зейнетақың көп болады" деп үгіттеген көрінеді.

"Ал, керісінше сау адам екеніңді дәлелдеуге тырыссаң, сөзіңді кес-кестеп есі ауысқан етіп көрсетуден де тайынбады", - дейді Бота.

"Мүгедектер мен қарттар үйіне жаңа басшы келген сайын басқа адамдардың қамқорында жүргендердің барлығы қайтадан мекемеге жиналатын. Мені де қайтарып алды. Бірақ, бұрынғы үйде ары қарай тұра бергім келетінін айтсам да, жаңа басшы рұқсат бермей қойды. Қарсылық көрсеткен мені директор тор бөлмеге қамап ұстады. Ол қараңғы бөлмеде өткізген 6 ай мен үшін ең қорқынышты уақыт болды. Түрмеден кем емес", - деді Бота Сүлейменова.

Ботаның сөзінше, мүгедектер үйінің директоры жетімдерді өзінің жекебас мүддесіне пайдаланған. Одан қалды тамыр-таныстарына жегіп берген. Бала бағудан бастап, көмір тасып, от жағып, қара жұмыстың қайбір түрін талғамай істей беріпті. Бірақ, еңбегі бағаланбаған. Мазақ қылғандай 200 теңге ұсынатын деп ашына еске алды. Ал соңғы қамқоршысы, тіпті, шотындағы зейнетақысын оңды-солды жұмсапты. Бұл туралы "Қорғау" қоғамдық қорының құқық қорғаушысы Әлия Әбденова айтып берді.

"Ботаның ісі бойынша алда сот ісі жүреді. Бұрынғы қамқоршысы Ләззат Ботаға ай сайын 50 мың теңге төледім деп отыр. Құқық қорғаушылар ол ақпараттың рас-өтірігін анықтап жатыр. Жалған болған жағдайда 3 жылдағы жалақысын және осы уақыт бойы жұмсаған 600 мыңға жуық зейнетақы мөлшерін талап етпекпіз. Ләззат Ботаның зейнетақысына қымбат іш киімдер алып, көлігіне жанармай құйып тұрған", - деді Әлия Әбденова.

Ботаның қилы тағдырында Жаркенттегі арнаулы әлеуметтік қызмет көрсету орталығының қазіргі директорының да есімі де қоса аталады. Оның сөзінше, Бота өз асыраушысынан ақша талап етуге құқылы емес екен.

"Сол үйдің мүшесі, сол үйдің тіршілігіне бірге араласады. Жұмыс істейді. Бірақ енді тиын-тебенін оның ешқашан таршылық көрмеген. Мен енді ақымақ емеспін ғой. Мен одан ақша алып, келісіп, ол мүмкін емес нәрсе ғой. Бұл қызға көмектескім келді. Басқа менде 320 адам бар. Анаған-мынаған таратпаймын ғой адамдарды. Ондай құқық та жоқ. Мына қызға адам болады деп мен сендім", - деді Амантай Раев, "Мейірім" Жаркент арнаулы әлеуметтік қызмет көрсету орталығы" КММ директоры.

Талқылау