"15 жыл алғандай жоқтады": Заңгер Айгүл Орынбек Қайрат Нұртастың анасына ескерту жасады
Ұшақта шу шығарып, 15 тәулікке қамалып шыққан Қайрат Нұртастың анасын заңгер Айгүл Орынбек сынады. Бұл туралы Stan.kz ақпарат агенттігі хабарлайды.
Фото: Жеке парақшалардан алынды
Әнші қамауда отырғанда анасы әлеуметтік желіде ұлы туралы естеліктермен бөлісіп отырған еді. Заңгер Гүлзира Айдарбекованың іс-әрекеті баласының бұзақылығына қолдау білдіру деп түсіндірді.
“Мамасының баласы десе, мән бермейтін едім, айналдырған 15 күнді, он бес жыл алғандай жоқтады. Баласы кінәсіз болса мақұл екен, ел алдында жүрген жұлдыз ішіп алып төбелесу – ол қоғамдық ортада тыныштықты бұзу. Жас болса мақұл екен, жастықпен жасады ғой дейтін. Жасы қырыққа келген баласының іс- әрекетін күнде әлеуметтік желі арқылы жырлап отыру, бұл енді барып тұрған надандық. Заң үстемдігін орнатқымыз келсе, елдің алдында жүрген жұлдыздар бірінші тәртіпке бағыну керек. Биліктегі көкелердің алдында сайрап жүрміз, “крышалар құтқарып қалады” деген түсінікті жою керек. Қаншама жас жігіттер жазықсыз 10-15 жылды арқалап кетіп жатыр. Журналистер! Әділетсіздікке тап болып шырылдаған аналардың жанайқайын дәл осылай шығарсаңдар ғой шіркін”, – деп ашынды заңгер.
Құқық саласының маманы әншінің жанжалға анасын араластыруы дұрыс емес деп санайды.
“Баламның іс әрекеті дұрыс емес, бұл отбасымызға, менің жасаған жұмысыма үлкен сын” деп, бұл тақырыпты сол кезде жабу керек еді. Алайда баласынан батыр жасап, оны ақтап қайта-қайта мен анамын деп емірене беру – баланың жасаған заң бұзушылығын қолдау. Баласы елін қорғап соғысқа барып келсе, қоғамдағы жемқорлықпен күресіп жүрсе мейлі екен, оны түрмеден жарияға жар салып күтіп алу бұл енді масқара. Қырыққа келіп өзі жасаған ісіне өзі жауап бере алмай, анасын араластыру – ұят. Бұл – біздің қоғамда әлсіз мамасының балалары көбейіп кеткендігінің айқын көрінісі. Менімен келіспей “Ол – ана, баласын әрине қорғайды” дейтін шығарсыздар. Балам екен деп барлық жерге мұрнын сұға беру, баланың келесі қылмысқа жол ашуына мүмкіндік беру. Еркек еркекше шешім қабылдап, жауапкершілікті мойнына алатын уақытты, өзіне қалдыру керек. Қазіргі уақытта заңды көбінесе мамасының етегінен шыға алмайтындар бұзып жатыр", – деп жазды заң саласының маманы.
Айта кетейік, 15 күнде 18 тойдан қалған әншіні халық қоршап алғанын жазған едік.