Сағатына 603,5 шақырым жылдамдықта жүреді: Жапония әлемдегі ең жылдам пойызды жасап жатыр

Фото: Getty Images

Жапониядағы жаңа пойыз сағатына 603,5 шақырым жылдамдыққа дейін жетіп, әлемдегі ең жылдам пойыз атануы мүмкін. Бұл туралы Stan.kz ақпарат агенттігі Dailymail.co.uk-ға сілтеме жасап хабарлайды.

Бұл әсерлі көлік әлі де әзірленіп жатыр. Ол L0 сериясы деп аталады және магниттік жастықшада жүретін жапониялық пойыз болады.

Қазір Central Japan Railway Company компаниясы пойызды сынақтан өткізіп, өндіріс жұмыстарын жүргізіп жатыр. Бастапқыда жоба 2027 жылға жоспарланған еді, алайда кейін 2034 немесе 2035 жылға шегерілді.

Пойыз рельстен ажырап, ауада “қалқып” жүру үшін магниттік левитацияны қолданады, ал электрқозғалтқыш вагондарды алға жылжытады. Осы технология бұрын-соңды болмаған жоғары жылдамдыққа мүмкіндік береді.

Қолда бар мәліметтерге сүйенсек, жобаға бүгінге дейін 52 миллиард фунт стерлинг (22 триллион теңге) көлемінде қаражат жұмсалған.

Құрылыс аяқталған соң L0 сериялы пойыздар салынып жатқан Тюо-Синкансэн желісі арқылы Токиодан Нагояға жолаушыларды небәрі 40 минутта жеткізе алады.

Қазіргі таңда бұл бағыттағы сапар әдетте 1 сағат 26 минуттан 2,5 сағатқа дейін созылады.

Егер осындай жүйе Ұлыбританияда болса, әдетте 4–5 сағат 45 минут жүретін Лондон–Эдинбург бағыты пойызбен небәрі 1 сағатқа дейін қысқаруы мүмкін еді. 

Фото: Getty Images

L0 сериялы пойыз Еуропада жалпы жұмыс істей ала ма?

Euronews ақпаратына сүйенсек, бұл оңай болмайды. Негізгі себеп – мұндай тәсіл Еуропа мен Ұлыбританиядағы қазіргі нарық сипатына онша сәйкес келмейді.

Жоғары жылдамдықты пойыздарда басты назар көбіне функционалдылық пен өнімділікке аударылады, ал еуропалық нарықта жайлылық, сән-салтанат және қолжетімділік арасындағы тепе-теңдік маңыздырақ.

Сонымен қатар Ұлыбританияда кей бағыттар көрікті табиғат көріністерімен бағаланады, яғни пойыздың таулар мен ауылдардың арасымен асықпай жүргені жолаушыларға да ұнайды.

L0 сериялы пойыздар Еуропадағы әдеттегі пойыздарға қарағанда көлемі кішірек, әрі қуаты мен қолданылатын технологиясы үшін қымбат. Бұған қоса, оны Ұлыбританияда немесе Еуропа елдерінде іске қосу үшін арнайы тоннелдер салу қажет болады.

Дегенмен Ұлыбританияда жаңа теміржол бағыттары да пайда болып жатыр. Мәселен 15 күнде үш еуропалық елді кесіп өтетін қызықты теміржол сапары ұсынылады. Олардың бағыты Лондоннан басталып, жолаушыларға құрлықтағы ең көркем пейзаждарды тамашалауға мүмкіндік береді. Еуропадағы ең әсем бағыттардың бірі саналатын Linha do Douro теміржолы – ұзындығы 160 шақырымдық маршрут. Ол батыстағы Порту қаласын Алту-Доуру өңіріндегі Посиньюмен байланыстырады.

Маршруттың көп бөлігінде пойыз Португалияның шарап аймағының жүрегімен ағатын Дору өзенінің бойымен жүріп, жасыл жүзімдіктер, тарихи қалалар және дәстүрлі квинталар (шарап шаруашылықтары) жанынан өтеді.

Биыл бұл бағыт Ұлыбританияға дейін кеңейіп, жолаушыларға үш елдің тоғыз қаласында тоқтайтын 15 күндік ауқымды теміржол шытырманын ұсынады.

Саяхат Лондондағы Сент-Панкрас вокзалынан басталады және Париждегі Гар-дю-Нор вокзалына дейінгі Eurostar пойызына билет кіреді. Осылайша жолаушылар Ұлыбританиядан құрлықтық Еуропаға өткен сайын өзгеріп отыратын таңғажайып көріністерді тамашалай алады.

Айта кетейік, бұған дейін Жапонияның бұрынғы премьер-министрі Синдзо Абэні атып өлтірген адам өмір бойына сотталғаны хабарланған еді.