Қазақстанда жұмыссыз қалғандарға берілетін жәрдемақыға шектеу қойылып, мерзімі екі айға қысқарады

Қазақстанда жұмыссыздық бойынша жәрдемақы төлеу мерзімі 6 айдан 4 айға қысқартылып, оның ең жоғарғы мөлшері белгіленбек. Бұл туралы Stan.kz ақпарат агенттігі хабарлайды.

Еңбек және халықты әлеуметтік қорғау министрі Асқарбек Ертаев өзгерістер көлеңкелі схемаларды жою және әлеуметтік қордағы олқылықтарды реттеу мақсатында енгізілетінін айтты.

Министрдің айтуынша, өзгерістер әлеуметтік сақтандыру қорында анықталған кейбір заңсыз схемаларға байланысты енгізіліп отыр. 

"Бұрын пандемияға дейін жұмыссыздарға жәрдемақы 4 ай ғана төленсе, пандемия кезінде бұл мерзім 6 айға дейін ұзартылған. Енді қайтадан 4 айға қысқарту жоспарланып отыр. Сонымен қатар жәрдемақының ең жоғарғы шегі белгіленеді", – деді министр.

Қазір кейбір азаматтардың жұмыссыз ретінде тіркеліп, ай сайын 1 миллион теңгеге дейін төлем алып отырған жағдайлары тіркелген. Министр мұндай тәжірибенің дұрыс емес екенін атап өтті.

Оның сөзінше, негізгі мақсат "көлеңкелі схемаларды" жою және төлем жүйесін ретке келтіру екен. Сондай-ақ министр мемлекеттік әлеуметтік сақтандыру қорының дефолтқа ұшырады деген ақпаратты жоққа шығарды. Оның айтуынша, қор тұрақты жұмыс істеп тұр, қаржылық балансы оң.

Оқыңыз

Қазақстанда декрет төлемдері неге кешігеді және мемлекетте шынымен қаржы жетпей ме? Оқыңыз

Еске салайық, бұған дейін Қазақстанда МӘМС жарналарын төлеу тоқтаған жағдайда сақтандырылған мәртебе небәрі 3 ай ғана сақталатыны жиі сынға ұшыраған еді. Қоғамда жұмыссыз қалған азаматтардың қысқа мерзім ішінде медициналық көмектен қағылатыны туралы мәселе көтеріліп, жүйені жеңілдету қажеттігі айтылған. Осыған байланысты енді мәртебені сақтау мерзімі 6 айға дейін ұзартылғанын жазған едік.