Бес қабатты тұрғын үйдің жертөлесінде аутист балалар 12 ай жаттығып, түрлі үйірмелерге қатысады. Бірақ ата-аналар бұл жерде балаларға ешқандай жағдай жасалмаған дейді.

Данил Варфоломеевке 4 жасында аутизм диагнозы қойылған. Сол уақыттан бері жеткіншек осы орталықта емделіп жүр. Бірақ ерекше баланың анасы жертөле үнемі кәріз бен жаңбыр суына толатынын айтады. Соның кесірінен қабырғалар көгеріп, ұлының дерті одан сайын асқынды дейді.

“Биыл еріген қар суы басып, екі залға да кіре алмай қалдық. Ғимаратта үнемі ылғал тұрады. Мұнда терезелер жоқ, күннің көзі түспегендіктен, бөлме де суық. Балам жиі ауыратын болды. Басқа апаратын жер болмаған соң осында келеміз”, – деді Петропавл тұрғыны Елена Варфоломеева.

Құрбан айт намазы қай уақытта оқылады: Кестесі жарияланды

Жүзге жуық ерекше бала 50 шаршы метрге жетпейтін аумақта дамыту сабақтарына қатысады. Кішкентай екі бөлмеге бәрі сыймайды екен. Оның үстіне орталыққа келушілердің қатары жылдан жылға көбейіп келеді. Тіпті үйірмелерге қажет құрылғыларды да өз ақшамызға сатып алуға мәжбүрміз дейді.

“Әрбір оқу процесі үшін арнайы кабинет болғанын қалаймыз. Балаларға үлкенірек ғимарат керек. Өйткені келушілердің саны артып келеді. Біз енді қайда барып, кімнен көмек сұраймыз?! Бұл балаларды өмірге бейімдеу оңай емес”, – деді петропавлдық Татьяна Ковалева.

Қазір аймақта 5 мыңнан астам баланың мүгедектігі бар. Оның мыңға жуығы аутизм дертіне шалдыққан. Шенеуніктер өңірде дамуы тежелген ұл-қыздарды емдейтін жалғыз орын бар екенін жеткізді. Басқа ғимарат таба алмаймыз деп ашық айтты.

“Қазір білім беру мекемелерінде балаларға кабинет бөлу бойынша мүмкіндік жоқ. Өйткені мектептердегі барлық кабинет бос емес. Сондықтан мәселені шешетіндей мүмкіндік болмай тұр. Денсаулық сақтау басқармасы мен әлеуметтік бағдарламалар басқармасы көмек көрсетеді деп үміттенеміз”, – деп мәлімдеді СҚО білім басқармасының баспасөз хатшысы Әсел Оразбаева.

Қала билігі осыдан екі жыл бұрын тағы бір оңалту орталығының ашылатынын айтқан еді. Ата-аналар бұл жоспар әзірге жүзеге аспады деп қапалы.

Талқылау