"Өлімінен екі сағат бұрын ақша сұрап хабарласқан": Жамбылда өзіне қол салған сарбазға қатысты жаңа деректер шықты
Жамбыл облысындағы шекара заставасында әскери борышын өтеп жүріп, өзіне өзі қол салды деген сарбазға қатысты жаңа деректер шықты. Туғандарының айтуынша, ол қайтыс болардын бірер күн бұрын туыстары мен достарынан жанұшыра қомақты ақша сұрап хабарласқан, деп хабарлайды Stan.kz ақпарат агенттігі “Астана” арнасына сілтеме жасап.
Демек, суицид жасауына әскерилер тарапынан қысым болған деп топшылайды. Қара жамылған отбасының айтуынша, бала кезінен көпшіл, еті тірі, ауыздықпен алысқан асауды бағындырып өскен Бекбол өмірге құштар жан болған.
Қайтыс болардан екі сағат бұрын анасымен телефон арқылы тілдескен. Ұлының дауысындағы өзгерісті байқаған, себебін сұрағанда "ұйқыдан тұрып жатырмын", – деп қысқа қайырыпты.
“Ақша сұратуына қарағанда ар жағында қысымшылық болған. 17-сінен бастап сұрапты керек болып жатыр деп. Содан кейін 19-ында ғой жаңағыдай жағдай болғаны. Біреуден 20 мың, біреуден 30 мың сұраған керек болып жатыр шұғыл деп. Өзі пысық бала болатын. Ортасының алды болатын. Соған итермелеп отыр. Осының ашылуын талап етеміз”, – дейді марқұмның ағасы Қанат Қожахметов.
Олар тергеудің әділ өтіп, өлімге итермелегендер жазалануын талап етеді. Сарбазды ақтық сапарға шығарып салуға келген әскерилер "соңғы кезде қызымен ренжісіп жүрді, өмірімен қош айтысуына сол себеп болуы мүмкін" деген болатын. Қаралы жиында төбе көрсетсек, сүйіктісі мұны елдің алдында жоққа шығарды. Жазба әлеуметтік желіде тарады. Марқұм Бекбол Мираш қатты қорқып жүргенін жазыпты.
Еске салсақ, 22 тамызда Жамбыл облысында әскери міндетін өтеп жүріп көз жұмған Қызылқоға ауданы Миялы ауылының тумасы, 18 жастағы жауынгер Бекбол Мираштың денесі жер қойнына тапсырылды.