"Ешкімге ұнауға міндетті емеспін": Кәмшат Жолдыбаева өзі туралы пікір білдірген Әнел Әріноваға жауап берді

Танымал әнші Кәмшат Жолдыбаева “Жарқыраған жұлдыз” телебағдарламасына берген сұхбатында әріптесі Әнел Әріноваға жауап берді. Бұл туралы Stan.kz ақпарат агенттігі хабарлайды.

Бұған дейін KeshYou тобында 2006-2012 жылдары өнер көрсеткен Әнел Әрінова Кәмшат Жолдыбаевамен алғаш танысқан кезін еске алып, Кәмшат оған “ауылдағы мұғалім әйел” сияқты көрінгенін айтқан еді. Сондай-ақ ол алғашында Кәмшатты ұната қоймағанын жасырмады.

“Кәмшат маған ауылдағы мұғалім әйел сияқты көрінді. Тіпті Моляның өзі одан заманауи көрінетін”, – деді ол.

Оның бұл пікіріне әнші Кәмшаттың өзі жауап қатты. Ол Әнел Әріноваға ешқандай реніші жоқ екенін, әркімнің жеке пікірі болатынын айтты. Сонымен қатар әнші Әнелді сұхбаттың гүлі болды деп есептейді. 

“Әрине, бәрін жақсы қабылдадым. Әркімнің жеке пікірі бар. Ешкім ешкімге ұнауға міндетті емес. Сондықтан, бәрі жақсы. Мен Әнелді бұрын қалай құрметтесем, қазір де солай құрметтеймін. Айтқан сөздеріне ешқандай реніш жоқ, керісінше, оның пікірі шынайы болды, ал өзі сұхбаттың гүлі болды деп ойлаймын. Әнел сұхбат бергені үшін шығарылым өте қызық болды, егер ол болмаса, қаншалық өтетінін білмеймін”, – деді Кәмшат.

Оқыңыз

"Ерлерге арналған журналға жартылай жалаңаш түстік": КешYou тобының экс-мүшесі топтағы кезеңді еске алды Оқыңыз

Еске салайық, бұған дейін әнші Әнел Әрінова Кәмшат Жолдыбаеваның KeshYou тобына келген кезі туралы айтқаны хабарланған еді. Онда Кәмшат Жолдыбаева үшін топқа қосылған алғашқы жыл оңай соқпағаны айтылады.