"Енемнен қалған екі жүз жылдық қазанды қолданамын": Тамара Асар отбасындағы ерекше құнды дүниелер туралы айтты

Танымал әнші Тамара Асар алғаш рет отбасылық өмірі туралы айтты. Бұл туралы Stan.kz ақпарат агенттігі “Ұйқым келмейді” бағдарламасына сілтеме жасап хабарлайды. 

Әнші екінші рет тұрмыс құрып, Ажарлым есімді қызды дүниеге әкелген болатын.

“Жолдасым – үйінің тұңғышы. Үйленетін кезде жолдасымнан “ата-бабаңнан не қалды?” деп сұрадым. “Әкемнің аты жазылған кілем, балға мен балта, сосын анамнан қара қазан қалды” деді. “Қазан қарындасымның үйінде” деді. Жолдасым әулеттің үлкені болғандықтан, бүкіл құнды дүниелерді алдырттым. Қарындасының үйінен қазан да келді. Жақсыла жуып-тазалап, қолдануға болатын түрге келтірдім. Қазір тамақ істеуге қолданамын. Одан кейін 1829 жылы шойын болаттан құйылған үлкен қазан бар екенін айтты. Оны да алдыртып, биыл наурыз көже астық. Сенесіз бе, сол қазанға 5-6 жылдан соң 200 жыл толады. Үйде көп болмай, ән сапарға кеткенде “қазандарым орында тұр ма?” деп сұрап қоямын”, – дейді әнші. 

Сондай-ақ әнші отбасылық өмірінің қалай өрбіп жатқанын да айтып берді. 

“Өзімнен бұрын әкем қатты ұнатты. “Осы сенің адамың” деп батасын берді. Өнер адамы болғасын, әртүрлі қалада жүреміз. Жолдасым – Қостанай өңірінің тумасы. Осы күнге дейін “Саған үйленемін деген жігіт” болмапты. Жолдасым ол сөзді айтты. Бас-аяғы бір аптаның ішінде отбасын құрдық”, – дейді өнер иесі.