"Беттерінің санына байланысты": Қазақстанда төлқұжатқа арналған мемлекеттік баж салығы азаяды
Мемлекеттік кірістер комитеті 2024 жылдың 1 қаңтарынан бастап қазақстандықтардың төлқұжат үшін төлейтін салығы арзандайтынын мәлімдеді деп хабарлайды Stan.kz ақпарат агенттігі.
16 жасқа дейінгі балалар үшін төлқұжат беру мөлшерлемесі 8-ден 4 АЕК-ке дейін төмендейді. Нақты құны әлі есептелген жоқ. Себебі 2024 жылға арналған ең аз болжамды көрсеткіш әлі белгісіз. Бүгінде 1 АЕК – 3450 теңгені құрайды.
16 жастан бастап мемлекеттік баж салығы төлқұжат беттерінің санына байланысты болады. Олардың құны 36 бетке – 8 АЕК, 48 бетке – 12 АЕК болады.
Комитет сондай-ақ 2023 жылғы 21 мамырдан бастап мүліктік сипаттағы талап-арыздар бойынша соттардағы мемлекеттік баж мөлшерінің жоғарғы шегінің әрекет ететінін жеткізді. Жеке тұлғалар үшін – талап қою сомасының 1%, бірақ көп емес 10 000 АЕК, заңды тұлғалар үшін – талап қою сомасының 3%, 20 000 АЕК-тен аспайтын болады.
"Сот актілерін кассациялық тәртіпте қайта қарау туралы өтінішхаттар бойынша салықты қолдану тәртібін өзгерттік. Мемлекеттік баж салығы шағым берген субъектіге байланысты қолданылады", - делінген хабарламада.