"Ауруға шалдыққан көп адамның бірі деп қабылдауда": Мұхтар Шахановтың орынбасары президентке ашық хат жазды

Танымал ақын Мұхтар Шаханов бір аптадан бері өкпесі қабынып ауруханада жатыр. Ақынның орынбасары Құдияр Біләл бүгін президентке ашық үндеу хат жолдады. Бұл туралы ол желідегі парақшасында жариялады, деп хабарлайды Stan.kz ақпарат агенттігі. 


 "Қадірлі Қасым-Жомарт Кемелұлы!
Әлеуметтік желі бетінде хабарланғанындай, қазақтың бір туар дара перзенті Мұхтар Шаханов өзіңіз алаңдаушылық танытып отырған өкпе қабынуы ауруына шалдығып, Алматы қаласындағы "Қалқаман" ауруханасында ем қабылдап жатыр. Ауырғанына бір жұмадан асты. Емдеу шаралары әлі күнге дейін оң нәтиже бере қойған жоқ. Аурухана әкімшілігі Шахановты ауруға шалдыққан көп адамның бірі ретінде ғана қабылдауда. Ал Шаханов, өзіңіз білетіндей, КСРО кезінен бастап тәуелсіздік алуымыз үшін қызмет еткен санаулы тұлғаның бірі. Рас, жоғары билік шешімдерінің бәріне бірдей бас шұлғи бермейді. Бірақ сіздің ұлттық мәселелерге қатысты шешімдеріңізді жоғары бағалайды. Өзіңіз президенттікке сайлауға түскен кезіңізде де сізге ашық түрде қолдау білдіріп, ұлт зиялыларын сіздің төңірегіңізде жиналуға шақырған болатын.  Шаханов сол ниетінен бір сәтке де айныған жоқ", - делінген ашық хатта.

"Құрметті Қасым-Жомарт Кемелұлы! Қазақ халқы ерекше құрметтейтін Шахановтың ауруханада бір аптадан бері елеусіз ем қабылап жатуы, көпшілікке әртүрлі ой салуда. Оларда: "Мемлекет қазақ ұлтының мәртебесін, рухани құндылықтарын асқақтату тұрғысында бар өмірін сарп еткен Мұхтар Шаханов сияқты ұлттық тұлғалар денсаулығына неге назар аудармайды?", - деген алаңдаушылық бар. Мұндай  халық алаңдаушылығын өз мүдделеріне пайдаланғысы келіп жүрген күштер де аз емес. Соған орай сізден Шахановтың денсаулығына мемлекеттік тұрғыда назар аударуыңызды сұраймыз", - деп түйді Құдияр Біләл.

Естеріңізге сала кетейік, бұған дейін Мұхтар Шахановтың өкпесі қабынып, ауруханаға түскенін жазған едік. Ақынның денсаулығын алаңдаушылық білдірген жандардың саны көп. Осыған байланысты орынбасары Мұхтар Шахановтың жағдайы туралы айтып берді.
 

Талқылау
Пікір
Қазір оқып жатыр
Çàãðóçêà...
Қазір оқып жатыр