Астанада LRT-ның алғашқы рельстері пайда болды

Астанада №116 және №117 станциялар арасындағы LRT эстакадасының учаскесінде алғашқы 500 метр рельс жолын төсеу жұмыстары аяқталды. Енді жеңіл рельсті жол қондырмасының қысқы ауа райында қаншалықты шыдай алатынын зерттеуге болады. Бұл туралы Stan.kz ақпарат агенттігі хабарлайды.

Фото: CTS

Рельс жолы арматуралық жақтауды, шпалдарды, рельстерді және бекіткіштерді қамтиды. Эстакаданың жалпы ұзындығы – 22,4 шақырым. Оған қос жол төселеді, бұл пойыздардың өтуін, оларға техникалық қызмет көрсету және жөндеу жұмыстарын ыңғайлы етеді.

“Жол заманауи технологияларды қолдану арқылы төселді. Стандартты жол ені – 1435 мм, халықаралық стандарттармен жасалды. Рельстерді біркелкі төсеу пойыз доңғалақтарынан шығатын шуды және тербелістерді азайтады. Алдын ала кернеулі шпалдар жарылып кетуден қорғалған және аязға және ерітуге төзімді”, – делінген хабарламада.

• LRT құрылысы: Машинист болып жұмыс істегісі келетіндерді Қытайда оқытатын болды

• Астанадағы LRT 2025 жылдың соңына дейін іске қосылады

Келесі жылы күн жылыған кезде эстакаданың ұзындығы бойынша рельстер төселеді. Қыста қажетті материалдар дайындалады.

Эстакададағы рельс жолдарын төсеу жұмыстары 2025 жылы аяқталуы керек.

Еске салайық, бұған дейін Astana LRT компаниясының бұрынғы басшысы Талғат Ардан мен елорда әкімінің бұрынғы орынбасары Қанат Сұлтанбеков интерполда жеңіл рельсті көлік құрылысы жобасын іске асыру кезінде сыбайлас жемқорлық пен жымқыру ісі бойынша іздеуде болған. 2020 жыл­дың қазан айында басталған Astana LRT ісі бойынша жеті сотта­лушыға жеңіл рельсті трассаны салу кезінде 5,7 млрд теңгені ұрла­ды деген айып тағылды. Оларға мемлекеттік салада қызмет атқару құқығынан өмір бойына айыра отырып, 7 жылға бас бостандығынан айыру жазасы тағайындалды.