Алматыда УЕФА-ның жоғары талаптарына сай, 45 мың көрерменге арналған заманауи стадион салынады
Алматыда УЕФА-ның жоғары талаптарына сай, халықаралық жарыстарды қабылдай алатын, 45 мың көрерменге арналған заманауи стадион салынып жатыр. Бұл туралы Stan.kz ақпарат агенттігі хабарлайды.
Алматы қаласы Құрылыс басқармасының басшысы Нұрбол Нұрсағатов жаңа аренаның Құлжа және Талғар тасжолдарының бойында салынып жатқанын мәлімдеді. Жобаны іске асыруға аумақтан жалпы көлемі шамамен 32 гектар болатын жер бөлінген.
“Қазіргі уақытта нысанда құрылыс жұмыстары қарқынды жүргізілуде. Жоба заманауи спорт инфрақұрылымына қойылатын талаптарға сәйкес жүзеге асырылып, түрлі деңгейдегі жарыстарды өткізуге арналған толыққанды спорт кешенін қалыптастыруды көздейді. Болашақ стадион УЕФА-ның IV санаттағы талабына толық сай болады. Бұл халықаралық деңгейдегі футбол матчтары мен ірі спорттық іс-шараларды өткізуге мүмкіндік береді. Жоба аясында негізгі футбол аренасымен қатар жаттығу алаңдары, спортшылар мен командаларға арналған заманауи инфрақұрылым, жанкүйерлерге арналған аймақ, қауіпсіздік жүйелері және іргелес аумақты кешенді көріктендіру жұмыстары қарастырылған”, – делінген хабарламада.
ОқыңызӘкімдіктің мәліметінше, стадион негізгі көлік жолдарының бойында орналасып, жанкүйерлерге оған оңай қозғалуға мүмкіндік береді. Сондай-ақ жоба шеңберінде оған іргелес жол инфрақұрылымы дамытылып, көрермендер мен қала қонақтарының стадионға қолайлы қатынауы қамтамасыз етіледі.
Жаңа стадион Алматының спорт инфрақұрылымын дамытуға серпін беріп, халықаралық жарыстарды қабылдайтын ірі спорт орталығына айналмақ. Құрылыс жұмыстарын 2028 жылғы наурызда аяқтау жоспарланған.
Алматыдан Балиге дейін велосипедпен жеткен қазақстандық жұп 10 айлық сапары туралы айтып берді
