Күздің алғашқы демалысында Қазақстанда күн +37 градусқа дейін ысиды
Қазгидрометтің болжамынша, алдағы демалыс күндері Қазақстанның басым бөлігінде күн ашық әрі жауын-шашынсыз болады. Кей өңірлерде ауа температурасы +37 градусқа дейін көтеріледі. Бұл туралы Stan.kz ақпарат агенттігі хабарлайды.
5-7 қыркүйек күндері ел аумағының басым бөлігі атмосфералық қысымы жоғары аймақтың ықпалында болады. Осыған байланысты құрғақ әрі көбіне бұлтсыз ауа райы сақталады. Алайда еліміздің батысында, оңтүстігінде және оңтүстік-шығысында атмосфералық фронттардың әсерінен кей жерлерде қысқа мерзімді жаңбыр жауып, найзағай ойнайды. Сондай-ақ желдің күшеюі күтіледі.
Елдің басым бөлігінде жаздағыдай жылы ауа райы сақталады. Күндіз батыста, солтүстікте және орталықта ауа температурасы +25-тен +33 градусқа дейін, шығыста +20-дан +25 градусқа дейін болады.
Оңтүстікте күндіз ауа температурасы +28-ден +37 градусқа дейін көтерілсе, оңтүстік-шығыста +20-дан +30 градусқа дейін болады. Ал таулы және тау бөктеріндегі аудандарда +10-нан +20 градусқа дейін жылы болады.
Шығыс пен оңтүстік-шығыстың таулы аймақтарында түнде ауа температурасы төмендеп, күн салқындайды.
Атыраудағы лотос алқабы: Мамандар жергілікті емес өсімдіктердің экожүйені жойып жіберуі мүмкін екенін айтты
