Шығыс Қазақстан облысының бас мемлекеттік санитар дәрігерінің кезекті қаулысы шықты, онда санитария бекеттері мен жүріп-тұруға шектеулер енгізілетіні жазылған.

Атап айтқанда, Өскемен қаласының, Аягөз, Бесқарағай, Бородулиха, Шемонаиха, Үржар аудандарының әкімдері Шығыс Қазақстан облысының сыртқы шекараларына Алматы (1 бекет), Қарағанды (1 бекет), Павлодар (2 бекет) облыстары тарапынан кіруді/шығуды бақылау үшін 13 санитария бекетінің, "Ауыл", "Уба" пункттерінің (Шемонаиха және Бородулиха аудандарындағы бір-бір бекеттен) және Өскемен қаласы бойынша 7 бекеттің жұмысын қамтамасыз етуі қажет.

"Осы қаулыда көрсетілген адамдардан басқа, азаматтардың облыс аумағына және Өскемен аумағына кіруіне/шығуына тыйым салынсын. Бұл ретте облыс орталығында болуды қоспағанда, облыс тұрғындарының бір ауданнан/қаладан екінші ауданға кедергісіз жүріп-тұруына рұқсат етілсін", - делінген қаулыда.

Халықтың тыныс-тіршілігін қамтамасыз ету ұйымдарының, медициналық көрсеткіштер бойынша кететін және келетін адамдардың, транзиттік жолаушылар мен жүктердің автотасымалдаушыларының және кейбір басқа санаттардың қызметкерлеріне санитария бекеттері арқылы кедергісіз кіруге және шығуға (жол парақтарын, жұмысқа нарядтарды, тапсырма-жоспарларды, тауар жүкқұжаттарын, іссапар құжаттарын, медициналық мекемелердің жолдамаларын, жеке куәліктерін көрсеткен кезде) рұқсат етіледі.

Бұдан бөлек, облыс аумағында бірқатар шектеулер енгізілді:

халыққа корпоративтік, салтанатты, отбасылық және басқа да бұқаралық іс-шаралар өткізу үшін жеке меншік үйлер мен құрылыстарды жалға алуға тыйым салынды;
кейінге қалдыруға болмайтын шешімді талап ететін жағдайларды қоспағанда, мемлекеттік органдар мен ұйымдарда азаматтарды жеке қабылдауды, қызметкерлердің жеке қатысуымен кеңестерді, семинарларды және т.б. өткізуге тыйым салынды;
сұлулық салондары, шаштараздар, барбер шоптар (салондар, т.б.), массаж және татуаж, косметологиялық қызмет көрсететін объектілерге алдын ала жазылу бойынша, 1 келушіге кемінде 4 м2 қашықтықты сақтап, сағат 09.00-ден 19.00-ге дейін жұмыс істуге рұқсат етіледі;
күшейтілген санитариялық-дезинфекциялық режимді сақтаған жағдайда көрермендердің қатысуынсыз (бос мінбелерде) ұлттық құрамалар үшін спорттық жаттығулар өткізуге рұқсат етіледі;
жұмыс берушілер (мемлекеттік органдардың (ұйымдардың, кәсіпорындардың), квазимемлекеттік сектор органдарының, өзге де ұйымдардың, кәсіпкерлік субъектілерінің, кеңселердің) қызметкерлердің кемінде 80%-ы қашықтан жұмыс істеу нысанын сақтауы керек;

Еске сала кетейік, бұдан бұрын Шығыс Қазақстан облысының аумағында блок-бекеттер орнатылатыны хабарланған.

Сондай-ақ, елді мекендерде жүріп-тұру және үйден немесе пәтерден кез келген уақытта шыққан кезде бетперде режимін міндетті түрде сақтау, ал қоғамдық көлікте - кемінде 2 метр қашықтық (бір отбасы мүшелерін қоспағанда) енгізіледі.

Талқылау