"Бала асырап алғысы келеді": Роза Әлқожа халық әртісі Нұрғали Нүсіпжановтың орындалмаған арманын айтты

Белгілі әнші, сазгер Роза Әлқожа халық әртісі Нұрғали Нүсіпжановқа сәлем бере барды. Бұл туралы Stan.kz ақпарат агенттігі хабарлайды. 

Фото: https://www.instagram.com/roza_alqozha/

Өнер иелері саумалханада бас қосып, ән мен жырдан шашу шашты. 

“Сазгер, әнші, ұстаз Бағлан Бәбіжан құрбымыз біраздан бері “ағаға барып қайтайық” деп жүрген. Кеше соның сәті түсті. Халық әртісі, бүгінгінің аңызы Нұрғали Нүсіпжанов ағамызға сәлем беріп бардық. Биыл сахнада жүргеніне 70 жыл толады екен. Өзі 87-ге келіпті. Саумал орталығында жиылғандар ән сұраған соң шама келгенше бірнеше ән орындадық. Аға жер үй сатып алсам деп жинаған бар ақшасын Шәуілдірден келген бір алаяққа беріп, енді соны ала алмай пәтерде жүр екен…”, – деп бастады әңгімесін әнші. 

• Әнші Нұрғали Нүсіпжанов әріптесі Жеңіс Ысқақованы жылатып қойды

• 86 жастағы Нұрғали Нүсіпжанов трендке айналған видеоға түсіп, желіні жарды

Сондай-ақ өнер иесі әңгіме арасында халық әртісінің ең үлкен арманын да айтып қалды. 
“Өзім де кезінде ағадан сұхбат алған сияқты едім, бірақ шын ғұмыр-тарихын білмейді екенбіз ғой… Екі әйелден бес қыз көрген бұл кісінің орындалмаған арманы – ұлды болу. Ұрпағының жалғасын көргісі келеді екен. Жас жеңгеміз де ЭКО-ның бар ғаламатын көріп баққан, болмапты. Ендігі бар үміті – бала асырап алып, ағаның атына жаздыру. Баладай мәпелеп күтіп жүрген бұрынғы журналисті де аядым. Нұрғали Нүсіпжанов әлеміне бойлап, жазу-сызуын да ұмытыпты. Қайтпек керек?! Алла маңдайға берген болса бәрі де болар”, – деді әнші. 

Айта кетейік, осыдан бес жыл бұрын халық әртісі журналист Жадыра Сейдешпен шаңырақ көтерген еді.