"Жаңартуға 5 миллиард теңге бөлінді": Екібастұздық кәсіпкерлер ойын-сауық саябағының қайта жөндеуден өтуіне наразы
Екібастұздағы ең үлкен саябаққа қайта жаңарту жұмыстары жүргізілмек. Жаңа саябаққа 5 миллиард теңгеден астам қаржы жұмсалады. Бұрын ойын-сауық орталығы болған саябақ тынығу демалыс аймағына айналады. Бұған байланысты аттракцион иелеріне барлық құрылғыларды демонтаждау туралы нұсқау берілді. Алайда бұл шешімге тек кәсіпкерлер ғана емес, қала тұрғындары да қарсы. Бұл туралы Stan.kz ақпарат агенттігі хабарлайды.
Фото: Видеодан скрин
Мәліметтерге сенсек, Шахтер саябағындағы әткеншектер, сырғанақтар, айналма аттракциондар мен шолу дөңгелегі бөлшектеліп жатыр. Аттракциондардың басым бөлігі ескі болғанымен, жаңаларының иелері 5 наурызға дейін барлығын алып тастау туралы ескерту алған.
Блогер Виталий Фоминов халық бұл жерге әлі де келетінін және көп екенін айтты.
"1 маусымда саябақ толып кетеді – балалар да, ересектер де серуендейді. Егер аттракциондар алып тасталса, балаларды қыдыртатын жер қалмайды", – деді жергілікті блогер.
Кәсіпкер Динара Бекованың айтуынша, отбасылық кафесін жаңартуға 2,5 миллион теңге салған. Бірақ жалдау келісімшарты ұзартылмады, ал жаңа орын ұсынылмады.
"Қазіргі кафемді талаптарға сәйкес келмейтінін түсінемін. Сондықтан жаңасын салуға тырысып жүрмін. Бірақ маған бұл жерде орын бермейді, тек "Бәйтерек" ауданынан ғана ұсынады. Қазіргі таңда мен мүлдем орынсыз, ақшасыз қалып отырмын", - деді Динара Бекова.
Бұрынғы құрғақ субұрқақтың орнында қазір үлкен шұңқыр ғана тұр. Ол өнеркәсіптік кәсіпорындардың демеушілігімен орнатылғанымен, бірнеше маусым ғана жұмыс істеп, реконструкция басталғанда алып тасталды.
Өткен жылы қоғамдық тыңдауда ойын-сауық саябағын тынығу аймағына айналдыру туралы шешім қабылданды. 5 миллиард теңгеден асатын жоба 28 гектарды қамтиды және жасанды су қоймасы, теннис корты, мұз айдыны, жаяу жүргіншілер жолдары мен кешкі жарықтандыруды қарастырады. Алайда аттракциондар жобада жоқ. Жергілікті билік оларды "Екібастұздың 50 жылдығы" скверіне көшіруді ұсынды, бірақ оның аумағы небәрі 2 гектар. Кәсіпкерлер жаңа орынға қарсы емес, бірақ барлық аттракциондарға орын жетпей қала ма деп алаңдаулы.
"Біз жаңа орынға көшуге қарсы емеспіз. Бірақ ешқандай кепілдік жоқ. Менің 9 аттракционым бар. Егер маған тек жарты жер бөлсе, оларды қайда қоямын? Менен бөлек тағы екі кәсіпкер бар. Біз оларды бір-бірінің үстіне орнатуымыз керек пе?" – деді кәсіпкер Олег Войценин.
Қала әкімдігі кәсіпкерлердің мүддесі ескерілетінін айтып, басқа скверлерден қосымша жер қарастыратынын мәлімдеді. Дегенмен, наурыз айында аттракциондар толықтай алынып тасталуы тиіс, себебі реконструкция осы уақытта басталады.
Еске салайық, бұған дейін Қызылордадағы Назарбаев саябағын қайта қалпына келтіру жобасы дайындалды. Тұңғыш Президент саябағы халықтың қарасы үзілмейтін, таптырмас отбасылық демалыс орны. Жайлы аумақта шағын мерейтойларды атап өту үрдіске айналған. Сондықтан болар, жасыл желекке оранған жерде тынығушылар саны жыл сайын арта түсті. Осыны ескере келе, саябақ көлемін кеңейтуді, демалыс аймағын жаңартуды жолға қою мақсат етілді. Оған демеушілер есебінен жаңғырту жобасы әзірленген.