Шымкентте баспаналы болу үшін "пара" берген әйел әкімдікке келіп, шу шығарды

Шымкент әкімдігінде күлкілі оқиға орын алды. Қала тұрғыны жергілікті шенеуніктердің біріне ақша бергенін айтып, әділдік талап етіп келді. Тұрғынның айтуынша, ол баспана басқармасаның төрайымы Жанат Өтебаеваға үй кезегін жылдамырақ жылжытып беруі үшін 200 мың теңге берген. Осы ақшаға оған жаңа тұрғын үйден пәтер уәде етіліпті, деп хабарлайды Stan.kz ақпарат агенттігі "Отырарға" сілтеме жасап. 

Уәде етілген дүниесін күте алмаған әйел әкімдікке келіп, ақшаны кері қайтаруды немесе пәтер беруді сұраған. Оны баспана басқармасының басшысы Жанат Өтебаеваның өзі қарсы алды. Әңгімелесу кезінде әйелдің алаяқтарға алданып қалғаны анықталды. Ал Жанат Өтебаеваның аталған іске қатысы жоқ болып шықты. 

"Бұл әйел менімен телефон арқылы тілдескенін айтты. Әрине, мен телефон нөмірін көрсетуді сұрап, хабарластым. Тұтқаның арғы жағындағы әйел өзін баспана басқармасының басшысы Жанат Өтебаева деп таныстырған кезде қатты таңғалдым. Мен пәтерлі болғым келетінін айтып едім, ол өзінің шарттарын қоя бастады. Ақырында шыдамай, Жанат Өтебаева екенімді айттым. Алаяқ мені балағаттап, тұтқаны қоя салды", – дейді баспана басқармасының басшысы. 

• Шымкентте лауазымды тұлғалар "Аrtsport" платформасы арқылы ақша жымқырған

• БҚО тұрғыны қант, қағаз бен астық тапшылығын пайдаланып, миллиондаған ақша тапқан

Жанат Өтебаева полицияға шағым түсіріп, алаяқты жазалауды талап етті. Ол қала тұрғындарын бейтаныс адамдарға сенбей, біреуге ақша жібермес бұрын ақпаратты тексеріп алуға шақырды.