Qarmet жаңа кешені жылына 240 мың тонна өнім шығарады
Qarmet компаниясы 2025 жылдан бері жаңа өндірістік кешен салып жатыр. Бұл кешенде металлды мырыштау және оған полимерлі жабын жағу жұмыстары жүргізіледі.
Жоба металлургия комбинатын жаңғырту бағдарламасының бір бөлігі саналады. Жаңа өндіріс іске қосылғаннан кейін компания мырышталған және полимерлі жабынды металл өнімдерін әлдеқайда көп көлемде шығара алады.
Жоба аясында жылдық қуаты 240 мың тонна болатын ыстықтай үздіксіз мырыштау желісі және жылына 180 мың тонна өнім шығаратын полимерлі жабындар желісі салынады.
Құрылыс нысанының жалпы аумағы 30 мың шаршы метрден асады.
Негізгі технологиялық жабдықтарды жеткізуші ретінде John Cockerill Industry Technologies Co. Ltd (Beijing) компаниясы таңдалды. Компания өнеркәсіптік жобаларды іске асыруда және металлургия саласына арналған технологиялық шешімдерді жеткізуде мол халықаралық тәжірибеге ие.
"Қазіргі кезеңде базалық инжинирингті қабылдау және құрылыс алаңын дайындау жұмыстары аяқталуға жақын. Жобаның ауқымы шамамен 200 мың текше метр жер қазу жұмысын, 20 мың текше метр темір-бетон конструкцияларын салуды, 7 мың тоннаға жуық металл конструкцияларын монтаждауды және 5,5 мың тоннадан астам технологиялық жабдықты орнатуды көздейді", – деді жоба мамандары.
Жобаны іске асыру нәтижесінде Qarmet мырышталған және боялған прокат өндірісін ұлғайтып, жоғары қосылған құны бар металл өнімдері нарығындағы өз позициясын нығайтады. Сондай-ақ компания Қазақстанның құрылыс, өнеркәсіп және инфрақұрылым салаларын заманауи отандық өніммен қамтамасыз етуге мүмкіндік алады.
