Павлодарда 6-сынып оқушысы құрдастарына пышақ сұққан

Павлодарда 6-сынып оқушысы кәмелетке толмаған екі баланы жиналмалы пышақпен жаралады. Бұл туралы Stan.kz ақпарат агенттігі хабарлайды. 

Фото: Rupr.pvlshakeneva Instagram-парақшасы

Оқиға 11 қыркүйекте Павлодарда Қамзин көшесіндегі Эрзи дүкенінің жанында болған. Балалар болған жайды ешкімге айтпай, үйіне қайтқан. Кейін екеуі ауруханаға түсті.

Олар №21 мектепте оқиды екен.

“Бір баланың сол жақ жамбасы кесілген, екіншісінің сол жақ жамбасында көгерген жарақат бар. Медициналық көмек көрсетілгеннен кейін оқушылар амбулаторлық емделуге жіберілді. Қазір олар сабаққа барып жүр”, – деп хабарлады денсаулық сақтау басқармасының баспасөз қызметі.

Полиция алғашында шабуыл жасаған адамның жасына байланысты қылмыстық іс қозғамады. Себебі ол әлі 14-ке толмаған. 

“Оқиға болған кезде кінәлі қылмыстық жауапкершілікке тартылатын жасқа толмаған. Осыған байланысты кәмелетке толмаған баланың ата-анасы баланы тәрбиелеу, құқықтарын қорғау және қауіпсіздігін қамтамасыз ету бойынша міндеттерін орындамағаны үшін әкімшілік жауапкершілікке тартылды”, – деп хабарлады полиция.

Енді бала үйден оқиды. Бірақ осыдан соң қылмыстық іс қозғалғаны белгілі болды.