Маңғыстауда ата-аналар соңғы қоңырауды тойлау үшін балаларына жасырын түрде үй жалдап берген
Мамырдың 25-інен 26-сына қараған түні Маңғыстау облысында өткен рейд барысында түлектер кешін өткізуге қатысты көптеген заң бұзушылықтар анықталды. Бұл туралы Stan.kz ақпарат агенттігі Lada.kz сайтына сілтеме жасап хабарлайды.
Фото: pixabay.com
Ақ желкен ауылында кезекшілікте жүрген ұстаздар түлектер мектеп бітірулерін жеке үйлерде тойлағанын анықтады. Кафе және мейрамханалармен қатар жеке үйлерде де кеш ұйымдастыруға тыйым салынғанына қарамастан, түлектердің ата-аналары соңғы қоңырауды тойлау үшін жасырын түрде пәтер жалдаған болып шықты.
Түлектердің ата-аналары шектеулермен таныс екендері туралы қолхат та жазған болып шықты.
Арнайы штаб мүшелері қайта түсіндіру жұмыстарын жүргізді.
“Ата-аналар, кәмелетке толмаған балаларыңыздың қауіпсіздігіне жауапты сіздерсіздер. Алдын ала бұл туралы сіздерге ескертілді. Біле тұра осындай нәрсе жасап отырсыздар", – деп түсіндірді №15 орта мектептің директоры Асқар Досов.
Айта кетейік, бұған дейін желіде мұғалімдерді пост жазуға мәжбүрлеп жатқаны туралы ақпарат тарады. Айтуларынша, оларға соңғы қоңыраудың өтпейтіні туралы шешімді қолдап пікір қалдыру талап етілген.