Көкшетауда халықаралық деңгейдегі инклюзивті спорт кешені салынуда

Көкшетау қаласында паралимпиадашыларға арналған арнайы залдары және аутизмі бар балаларға арналған жеке блогы бар бірегей Инклюзивті спорт орталығы бой көтеруде. Жалпы аумағы 3 600 шаршы метрді құрайтын нысан Сарыарқа шағынауданында салынып жатыр. Оны биылғы жылдың желтоқсан айында пайдалануға беру жоспарланған.

Жаңа кешен Ақмола облысының тұрғындары үшін маңызды оңалту орталығына айналмақ. Өңірде ерекше қажеттілігі бар 14 мыңнан астам бала тұрады. Бір жарым гектар аумақта спорт, білім беру, профилактика және шығармашылық бағыттарын қамтитын толыққанды инфрақұрылым қалыптастырылады. Орталық бір ауысымда 300 адамды қабылдауға қауқарлы болып, барлық жастағы азаматтар үшін қолжетімді болады.

Құрылыс компаниясының өкілі Ерлан Бегалиннің айтуынша, орталық заманауи еуропалық медициналық жабдықтармен қамтамасыз етіледі. Универсалды спорт залында еденді жылыту жүйесі орнатылады, бұл отырықшы спорт түрлері үшін маңызды техникалық талап болып саналады. Нәтижесінде нысан емдеу және профилактикалық қызмет көрсететін толыққанды кешенге айналады.

Жобаның тұжырымдамасы жарты жыл бойы сарапшылармен бірлесіп әзірленген. Негізгі мақсат – функциялық мүмкіндіктері жағынан елордадағы ұқсас нысандардан да жоғары деңгейдегі орталық құру.

Ақмола облысының әкімі Марат Ахметжановтың айтуынша, бұл кешеннің ерекшелігі – аутизмі бар балаларға арналған арнайы блоктың енгізілуі. Бұл өңірде сапалы инфрақұрылымды елорда деңгейінде дамытуға мүмкіндік береді. Сонымен қатар, орталықта мүмкіндігі шектеулі спортшылар арасында халықаралық жарыстар өткізуге жағдай жасалады.

Қоғам белсендісі Махаббат Қасымова бұл жобаның ата-аналар үшін маңызы зор екенін атап өтті. Оның айтуынша, орталықта аутизм және балалар церебралды сал ауруы бар балалармен жұмыс істеуге арналған ABA-терапия және сенсорлық интеграция әдістерін енгізу жоспарланып отыр. Қазірдің өзінде білікті мамандарды даярлау мәселесі талқылануда.

Құрылыс жұмыстарына шамамен 400 адам жұмылдырылған. Нысанды пайдалануға беру осы жылдың желтоқсанына жоспарланған. Кешеннің "Viamedis" клиникасымен іргелес орналасуы Кокшетауда заманауи медициналық кластер қалыптастыруға мүмкіндік береді.